26-28-февралдиз РД-дин Кьил Сергей Меликован тапшуругъдалди Дагъустан Республикадин Гьукуматдин гегьенш делегация Беларусь Республикадиз кIвалахдин рекьяй мугьманвилиз фена. РД-дин Гьукуматдин Председатель Абдулмуслим Абдулмуслимова регьбервалзавай делегациядик гьакIни адан заместитель Ризван Гъазимегьамедов, РД-дин карчивилин ва инвестицийрин рекьяй агентстводин кьил Гьуьсейн Гьуьсейнов, са жерге министерствойрин, бизнес-жемиятдин векилар, карханайрин кьилер квай.
РикIел хкин, сифте сеферда Дагъустандин делегация Беларусдиз 2023-йисуз мугьман хьанай ва а чIавуз кьве патан алакъайрин бине кутунай.
Сифтени-сифте Абдулмуслим Абдулмуслимов Минскдин индустриядин «Зурба къван» паркуниз фена. Парк Ипекдин рекьин экономикадин «чIулунин» важиблу нукьтIа я ва ада Европадин, СНГ-дин ва Россиядин арада алакъадин важиблу роль къугъвазва. Им Беларусдинни Китайдин арада экономикадин алакъайрин сергьятра авай уртах проект я.
27-февралдиз Абдулмуслим Абдулмуслимов Беларуссиядин муьштерийрин жемиятрин республикадин союздин Правленидин председатель Инесса Короткевичахъ галаз гуьруьшмиш хьана ва алишверишдинни экономикадин алакъаяр гегьеншарунин, гьа жергедай яз Дагъустанда Беларусдин Алишверишдин кIвал ачухунин месэла веревирдна. Мад са месэла — сар гьасилунин ва гьялунин хиле санал кIвалахун. Дагъустанди Беларусдин мулкунал сар гьялдай саналди тир кархана ачухдайвал я. ИкI, пландин бинедаллаз Дагъустанда гьасилзавай ва чуьхвенвай сар Беларусдиз рекье твада, ана абурукай парча ва гъалар гьазурда. Сун парчадикай шейэр кьве республикадани цвадайвал я. Арадал атай вини еридин сун парчадикай военный къуллугъчияр патал, гьакIни мектебра аялри алукIдай алай аямдин парталар цвадай фикир ава. А. Абдулмуслимов СНГ-да виридалайни чIехиди тир михьи сарикай шейэр цвадай карханадиз мугьман хьана. Ам гьакI «Витебскдин гамар» ОАО-дин гендиректор Артем Лоханкинахъ галазни гуьруьшмиш хьана.
Беларусда Россиядин векилханадин кьил Борис Грызловахъ галаз хьайи гуьруьшдал А. Абдулмуслимова республикайрин арада алишверишдинни экономикадин рекьяй алакъайриз талукь яз гьазурнавай планда къалурнавай серенжемар кьилиз акъудзавай тегьердикай лагьана.
Къейд ийин, 2025-йисан тахминан майдин-июндин варцара Дагъустанда Даггосфилармониядин майдандал Беларуссиядин кинодин йикъар кьиле тухуда. Дагъустандин ва Беларусдин карханайри сепараторар маса гуниз талукь икьрар кутIуннава. Кьве уьлкведин гьукуматри 2025-2028-йисара, санал кIвалахунин сергьятра аваз, кьиле тухудай мярекатрин пландал къулар чIугуна.
Минскда РД-дин Гьукуматдин Председателди Александр Невскийдин памятникдал ва Гъалибвилин монументдал цуьквер эцигна. Делегациядин кIвалахдикай тамам делилар РД-дин Гьукуматдин сайтда чапнава.
Саида Мурадова
