НАТО гьазур жезва
Къецепатан разведкадин къуллугъдин директор Сергей Нарышкина Самаркандда СНГ-дин уьлквейрин хатасузвилин органрин ва махсус къуллугърин регьберрин советдин заседанидал малумарайвал, НАТО-диз Россиядихъ галаз дяве авун патал са куьруь вахтунда къуватар гьазуриз кIанзава.
«Чаз, гьелбетда, Европада НАТО-дин амадагар Россиядихъ галаз дяведиз гьазурзавайди аквазва. Герек тир вири такьатралди таъминарунин макьсад вилик эцигнава. Европадин военный промышленностдин суьрсет са шумудра артухарунин кардик кьил кутунва. Вахт-вахтунда мобилизациядин серенжемар тешкилунин, Москва мидя хьиз къалурунин таблигъат тухунин гьерекатар ийизва», — кхьенва «РИА Новости» чешмеди раижай малуматда.
Нарышкина къейд авурвал, цIийи къалмакъалар акъат тавун патал исятда кьве патани са бязи истемишунрилай гъил къачун, са жуьреда икьрардал атун, жавабдарвал аннамишун герек я.
Гежел вегьин мумкин я
Венгрияда тешкилдай Россиядинни США-дин президентрин гуьруьш яргъал вегьин мумкин я. «СNN» чешмеди къейдзавайвал, кьве уьлкведин къецепатан крарин министррин — С. Лаврованни М. Рубиодин — арада алай гьафтеда кьиле фена кIани гуьруьш малум тушир себебралди кьулухъ янава.
Владимир Путин ва Дональд Трамп 16-октябрдиз телефондай рахана. Кьилди къачуртIа, Трампа рахунар нетижалубур яз гьисабна. Гуьгъуьнлай ада Будапештда кьиле фидай гуьруьшдикайни малумат ганай.
Финляндиядин «Альянс свободы» партиядин векил А. Мема «Х» соцсетда кхьенвайвал, Путинни Трамп гуьруьшмиш жедалди вилик Зеленский Лондондиз фида. «Британиядин гьукумдарри адаз мад рахунар кьиле тухумир лугьудани? Ислягьвилел атун патал ийизвай крар чIурдани? Мумкин я», — кхьенва ада.
Венгриядин премьер-министр Орбана умуд кутазвайвал, Будапештда кьиле фидай саммит Украинада ислягьвал арадал гъидайди жеда.
Махсус серенжемдикай
Россиядин аскерри Днепропетровскдин областда чилин кIаник квай ракетаяр туькIуьрзавай цех тергна. Идакай 21-октябрдиз «РИА Новости» чешмеди хабар гузва.
Россиядин «Восток» кьушунрин артиллеристри и областда ВСУ-дин блиндажар ва гуьлле гудай махсус чкаяр тахьай мисална. Идалай вилик Украинадин СМИ-ри регионра са жерге хъиткьинунар хьайидакай хабар ганай.
РФ-дин оборонадин министерстводи 21-октябрдиз хабар гайивал, Украинадин аскерри регионрал беспилотникар ахъаюн давамарзава. Кьилди къачуртIа, са йифен муддатда ПВО-дин такьатри 55 беспилотник яна. Абурукай 34 беспилотник Ростовдин областда тергна. Муькуьбур — Воронеждин, Липецкдин областра, Краснодардин крайда, Крымда ва Чlулав гьуьлуьн сергьятра.
ВСУ-ди яшайишдин объектрал ийизвай гьужумриз жаваб яз, Россиядин кьушунри Украинадин кьушунриз, гьакъидихъ кьунвай аскерриз, техникадиз ягъунар кьазва. Чибуру оборонадин промышленностдиз, алакъадиз, энергетикадиз зарар жедайвал ягъунар давамарзава.
Дустагъун хиве кьунва
Канададин премьер-министр Марк Карниди Израилдин премьер-министр Биньямин Нетаньяху, МУС-дин (международный уголовный суд) ордердал асаслу яз, эгер ам Канададин мулкара пайда хьайитIа, дустагъ ийида лагьанва. Идакай «The Toronto Sun» газетда кхьенва.
Гьа са вахтунда макъаладин авторри Канададин премьер-министр уьлкведин месэлайрал машгъул хьун герек яз гьисабзава. Абурун фикирдалди, Канадади США-дихъ галаз алакъаяр мад сеферда чIур хъувун герек жезвач.
«Лезги газет»
