Дагъустандин Кьил Сергей Меликова республикада «вейпар» (абуруз гьакI­ни электронный пIапIрусар лугьузва) маса гунал къадагъа эцигун теклифнава. И месэла веревирд авун патал РФ-дин Госдумадиз рекье тунва. Идакай РД-дин Кьилин Администрациядин телеграм-каналди хабар гузва.

Россияда, санлай къачурла, адетдин­ пIапIрусар чIугвазвайбурун кьадар­ тIимил хьанватIани, «вейпар» ишлемишза­вай­бу­рун кьадар къвердавай артух­ жезва­. Гьа са вахтунда уьлкведин­ здравоох­ра­не­ни­дин министерстводин пресс-къул­лугъ­ди хабар гузвайвал, гзаф­ни-гзаф электронный пIапIрусар чIугваз­вай­бур жа­ванар я.

Сергей Меликова гьисабзавайвал, инсандин сагъламвал патал акьалтIай зиян авай и суьрсет маса гунин патахъай кардик кутунвай къадагъаяр тIимил я. Ада гьакIни рикIел хкайвал, виликдай Нижегородский областдин губернатор Глеб Никитина регионриз «вейпар» кура-кура маса гунин гьакъиндай къадагъаяр тайинардай ихтиярар гана кIанзавайди къейднай. И теклифдин тереф РФ-дин Президент Владимир Путина хвенай.

«Дагъустан электронный пIапIрусар кура-кура маса гун къадагъа ийизвай регионрикай сад яз тайинарун тIалабзава. Чи фикирдалди, ихьтин серенжемди «вей­пар» себеб яз начагъ жезвай агьа­лий­рин кьадар тIимил хьуниз таъсирда», — къейднава С. Меликова РФ-дин Госдумадиз рекье тунвай чарче.

Лагьана кIанда, виликдай уьлкведин здравоохраненидин министерстводи и месэладин гьакъиндай гайи вири­ тек­лифрин тереф хвенай. «Вейпар» чIугуни никотиндилай аслу хьунал гъизва. Адакди инсанрик жигеррин, рикIинни дамаррин, онкологиядин азарар акатзава.

Агьмед Магьмудов