США-дин ракетайриз талукь яз

США-дивай Украинадиз вини кьил 50 Tomahawk ракета ракъуриз жеда. Идакай «Financial Times» чешмеди хабар гузва.

«Вашингтондивай Киевдиз 20-далай 50-дал кьван ракетаяр ракъуриз жеда, ибуру дяведин гьалар дегиш хьунин жигьетдай са акьван таъсир ийидач», — лагьанва малуматда.

Пентагондин виликан къуллугъчи М. Канчиана хабар гузвайвал, США-дихъ тIвар кьунвай ракетаяр 4150 ава.

Ракетайрин месэладикай алатай гьафтеда США-дин президент Дональд Трампа ихтилатнай. Ада лагьанай хьи, Украинадиз ракетаяр ракъурунин месэла саки гьялнава, амма яракьар гьикI ишлемишиз кIанзаватIа, гьа кар чир хьун важиблу я.

Кремлди ихьтин кам къалмакъал мадни къизгъина­рунихъ галаз алакъалу тирди малумарнава. Россиядин­ Президент Владимир Путина къейд авурвал, жаваб яз, Москвади ПВО мадни къуватлу ийида. Ада гьакIни Tomahawk ракетаяр Украинадиз ракъуруни Россиядинни США-дин алакъайриз зиян гуда лагьана. Гьа са вахтунда алава хъувуна хьи, ракетаяр Америкадин военный къуллугъчийрин иштираквал авачиз ишлемишиз хьун мумкин туш.

Алишверишдин женг

Китайдин алишверишдин министерстводин сайтда хабар ганвайвал, уьлкве США-ди малумарнавай тарифрин дяведихъ галаз эхирдалди женг тухуз гьазур я.

Къейдзавайвал, Дональд Трампа Китайдин метягьар патал 100 процентдин пошлина кардик кутада лагьана гьелягьар кьурдалай кьулухъ Китайдинни США-дин дестейри меслятар авун давамарзава.

«Эгер квез женг тухуз кIанзаватIа, чна эхирдалди женг тухуда; эгер рахунар кьиле тухуз кIанзаватIа, чи ракIарар ахъа я», — лагьанва малуматда.

Д. Трампа Вашингтонди Китайдиз талукь яз 1-ноябр­дилай таможнядин пошлинайрин кьадар 100 процентдин хкажда лагьанай.

Манийвалзавай себебар

Россиядихъ ядерный жигьетдай авай мумкинвилер ва Китайдихъ галаз хъсан алакъаяр хьун себеб яз, Рагъ­акIи­дай патан уьлквейривай Москвадиз са артух тади гуз жезвач. Идакай «WSJ» чешмеда кхьенва.

Чешмедин делилралди, гьатта США-дизни, мумкин­вилерикай менфят къачуналди, гьалар къизгъинардай еке ашкъи авач.

Ватандашвиликай магьрумиз кIанзава

Владимир Зеленскийдиз Одесса шегьердин мэр Ген­надий Труханов Украинадин ватандашвиликай магь­рум ийиз кIанзава. Ихьтин фикир Зеленскийдин офисдин сайтда кхьенва. Малумарнавай петициядин авторри хабар гузвайвал, Трухановахъ гуя Россиядин ватандашвал ава. Шегьердин кьилиз акси петициядал суткадин муддатда 25 агъзур касди къулар эцигна.

Зеленскийди идалай вилик Одесса шегьердин ва областдин кьиле акъвазнавай ксари энергетика хуьнин месэлайра гзаф гъалатIриз рехъ гайидакай­ ихтилатна. Амма чкадин гьукумдарри рехъ ганвай гъа­латIар гьихьтинбур ятIа ада тайиндиз лагьанач. Труханова вичихъ Россиядин ватандашвал ава лагьай хабар къалпди тирди тестикьарзава.

Тереф хуьзвач

Россияда авай Франциядин векил Николя де Ривьера къейднавайвал, Евросоюздин сергьятра аваз, Россиядин активар чпиз вахчунин фикирдин тереф Францияди хуьзвач. «Мад сеферда кьетIендаказ къейдзава: Франциядин фикир тайинди я. Ихтилат чаз талукь тушир такьатар вахчуникай физвач. Гьар са гьерекат кIевелай къанундал амал авунвайди хьун важиблу я», — лагьанва ада «Ведомости» газетдиз гайи интервьюда.

Дипломатди алава хъувурвал, Евросоюзди эхиримжи йисара Украинадиз куьмек гун патал анжах и активрилай къвезвай къазанжияр ишлемишна.  Алатай вацра Европадин комиссиядин кьил Урсула фон дер Ляйена Украинадиз, Россиядин активар ишлемишуналди, такьатар чара авунин теклиф ганай.

РФ-дин МИД-ди Россиядин активар ишлемишун угъ­ривал тирдакай са шумудра лагьана. Россиядин дип­ломатри къейд авурвал, ЕС-ди гьам кьилдин ксарин, гьамни гьукуматдин активар лишандиз къачунва.

«ЛГ»