13-октябрдиз Махачкъалада РД-дин Гьукуматдин Председателдин Сад лагьай заместитель Руслан Алиеван регьбервилик кваз республикадин министррин кабинетдин заседание кьиле фена. Анал веревирд авур асул месэлаяр регион экономикадинни яшайишдин рекьяй вилик тухунихъ ва мукьвал тир 3 йисан бюджетдин проект арадал гъунихъ галаз алакъалубур тир.
Р. Алиева къейд авурвал, Дагъустандин экономикадин хиле йисалай-суз агалкьунар жезва. Хъсан агалкьунар экономикадин хъендик квай сектордин кьадар тIимиларунин кIвалахда, туризмдин, транспортдин къурулушдин хилера хьанва. Хуьруьн майишатдин хиле гьасилзавай суьрсетдин кьадар, алай йисан 8 вацран нетижайралди, 2 процентдин артух хьанва.
…Вилик квай пуд йисан бюджетдиз талукь проектдин гьакъиндай лугьудайла, Сад лагьай вице-премьерди хабар гайивал, Дагъустанда 2026-йисуз яшайишдин, здравоохраненидин ва образованидин хилериз 117 миллиард манат пул чара ийида. Рекъемрин чIалалди лагьайтIа, им республикадин бюджетдин вири харжийрин 56 процент я. И такьатар яшайишдин пособийрин кьадар, муаллимрин, духтуррин, медениятдин хилен къуллугъчийрин мажибар артухаруниз, медицина ва образование тIем акакьдайди авунизни чара ийида.
«Коммунальный къурулуш цIийи хъувуниз, транспортдин хел вилик тухуниз, цIийи рекьер туькIуьруниз, хуьруьн мулкарни гъвечIи шегьерар комплекснидаказ вилик тухунин сергьятра аваз, проектар кьилиз акъудуниз хейлин такьатар чара ийида. Бюджетдин проект тамамдиз кьабулдалди вилик авай гьакъикъи мумкинвилерни экономикадин гьалар фикирда кьуна кIанда. Асул фикир важиблу ва кар алай месэлаяр гьялуниз гуда», — лагьана Р. Алиева.
Заседанидикай гегьеншдиз РД-дин Гьукуматдин сайтдай кIелиз жеда.
Чи мухбир
