Вахтунин месэла

США-дин президент Д. Трампа гьисабзавайвал, Ук­раинадин къалмакъалда Россия гъалиб жеда. «Президентдин фикир ахьтинди я хьи, Россия гъалиб жеда, месэла и кар патал гьикьван вахт герек жедатIа, гьадахъ галаз алакъалу я», — Лацу кIвалин чиновникди лагьанвай гафар «Politico» газетди малумарна. Къеднавайвал, Киевдив гекъигайла, Москвадихъ еке экономикани ава, армияни.

РикIел хкин, ислендиз Д. Трампа Москвадиз ислягьвилин икьрар кутIунун патал 50 йикъан муддат гана. Идакай «РИА Новости» чешмеди хабар гузва. Акси дуьшуьшда, мадни кIеви серенжемар кьабулда лугьуз, гьелягьар кьуна. Вичин шартIар кьилиз акъуд тавуртIа, ада Россиядиз ва адахъ галаз амадагвилин алакъаяр авай маса уьлквейриз 100 процентдин харж (пошлина) кардик кутунин къурху гана.

Са жерге сиясатчийри, журналистри къейдзавайвал, США-дин регьберди анжах вичин уьлкведин итижрикай я фикирзавайди.

Трампан фикирдалди, Россияни Украина ислягьвилин икьрар кутIунуниз 4 сеферда мукьва хьана, гьакI ятIани, арадал атай затI авач.

Д. Трампа В. Путинакайни Россиядикай ихьтин фикирни лагьана: «Путин викIегь инсан я. Ада гзаф ксар алцурарна — Клинтон, Буш, Обама, Байден, амма зун — ваъ. Гьерекатар хьана кIанда, нетижа хьана кIанда. За умуд кутазва хьи, нетижани жеда. Россия мумкин тир лап хъсан уьлкве я». Ада Россия экономикадин жигьетдай еке мумкинвилер авай уьлкве яз гьисабзава.

Трампа Киевдиз Америкадин яракьар ракъурун патал ЕС-дихъ галаз икьрардал атанвайдакай ихтилатна. Харжияр Европадин хиве тунва. Ракъуриз кIанзавай яракьрик неинки ракетаяр, гьакIни зенитдин ракетайрин «Пэтриот» комплексдин батареярни ква. Трампа тестикьарайвал, ихьтин 17 комплекс ракъурун фикирдиз къачунва.

Идалай вилик РФ-дин Президентдин пресс-сек­ре­тарь Д. Пескова тестикьарайвал, Россияди Украинадихъ галаз нубатдин рахунар кьиле тухун вилив хуьзва, амма Киевдик, аквазвайвал, тади квач. Москвади РагъакIидай патан уьлквеяр са шумудра тагькимарнай: ВСУ-диз яракьар гуни са карни дегишардач, и гьерекат­ди анжах къалмакъал яргъалди давам хьунал гъида.

Рафтарвилер дегиш жеда

Дяведин махсус серенжем куьтягь хьайидалай кьулухъ РагъакIидай патанни Россиядин рафтарвилер дегиш жеда. Ихьтин фикир чи уьлкведин виликан премьер-министр Сергей Степашина лагьана. Идакай «Лента.ру» чешмеди хабар гузва.

Адан фикирдалди, РагъакIидай патан уьлквейри исятда Украина патал туш женг чIугвазвайди, абуру Россия барбатIунин алахъунар ийизва.

Виликан чиновникди алава хъувурвал, хъсан адетар, инфраструктура авай, виликди физвай Россия садазни кIанзавач. «Гьавиляй, гьелбетда, чун чукIуриз алахъзава», — хълагьна ада.

Алакъаяр мягькемарзава

РФ-дин къецепатан крарин министр Сергей Лавров КНР-дин председатель Си Цзиньпинахъ галаз Тяньцзинда гуьруьшмиш хьана.  Абуру Москвадинни Пекиндин алакъайрин еримлувал веревирдна. Идакай «РИА Новости» чешмеди хабар гузва.

Лаврова Цзиньпинав Президент Владимир Путинан патай чар агакьарна. Китайдин регьберди меслят хьанвай икьрарар кьилиз акъудун давамарун, кьве уьл­кведин хатасузвал ва итижар хуьн, гзаф майданра, месела, ШОС-да (Шанхайская организация сотрудничества) сада-садаз гузвай куьмекар мадни мягькемарун герек тирди лагьана.

ШОС 2001-йисуз арадал гъанвай вири халкьарин тешкилат я. Адак  Индия, Иран, Къазахстан, Китай, Къиргъизистан, Россия, Тажикистан, Пакистан, Узбекистан ва Белоруссия акатзава.

Яракьлу кIеретIрин геле

Сириядин яракьлу кьушунрин подразделенияр ва уьлкведин МВД Сувейда шегьерда къанунсуз яракьлу кIеретIрин геле къекъуьнин гьерекатрив эгечIнава.

«Сувейда вилаятда хатасузвал ва пайгарвал мягькемарунин, гьакIни ихьтин тIвар алай шегьерда ягъунар кьиле фейидалай кьулухъ МВД-дин къуват­ри ва оборонади ислягь агьалияр хуьнин ва къайда арадал­ хкунин макьсаддалди шегьердин юкьваз кьушунар ракъурда», — кхьенва Сириядин гьукуматдин SANA агентстводи.

Гьазурайди — К. Ферзалиев