Мегьарамдхуьруьн райондин Хтун-­Къазмайрал икьван чIа­вал­ди та­хьай хьтин метлеблу мярекат­ кьиле фена. Сефилвилин шагьвар галай, шадвал кутадай спортдин вакъиа. Чи гьар са ватанэгьлидин рикI алай машгьур манида лугьузвайвал, «вилерал накъвар алай сувар».

Ина, женгинин махсус серенжем тухудайла, игитвилелди телеф хьайи Рамиз Рашидов ва вири ватанпересар рикIел хуьниз талукьарнавай азаддиз кьуршахар кьунай ачух турнир кьиле фена.

Вилерал нагъв хъитIкьиниз, игит хва Рамизан дидени буба, мукьва-кьилияр ва ярар-дустар. Рамиз гележег авай викIегь спортсмен, кьуршахар кьунай  Юждагдин чемпион тир.

Рамиз 1998-йисуз Мегьарамдхуь­руьн райондин Тагьирхуьруьн-Къаз­май­рал Абдулнасир ва Марита Рашидоврин хизанда дидедиз хьана.­ Школа куьтягьна, ар­миядин жергей­риз, гуьгъуьнлай Росгвардиядин спецназда­ къуллугъ ийиз гуьгьуьллудаказ фена. Четин имтигьанар агалкьунралди вахкай ам вичин хуьруьнви, къунши Руслан Примован разведчикрин кьетIен отряддиз рекье туна. Къуллугъдин вири девирда Рамиза вич чешнелу женгчи тирди къалурна. Адаз младший сержантвилин чин гана. Махсус серенжемда Р. Рашидова вири отряддихъ галаз гьа сифте йикъалай иштиракна. Кьвед лагьай юкъуз, 25-февралдиз — сад лагьай  женг.

А женг бейхабардиз башламиш хьанай. Чи разведчикрин са БТР-да авай гъвечIи десте, вири гьазурвилер акуна засадада ацукьнавай душманрин еке кIеретIдал расалмиш хьана. Сифте декьикьада командирдикай магьрум хьайи юлдашриз команда гун, женг тешкилун  сержант Рамиз Рашидова вичин хивез къачуна. Бейхабардиз гуьлле гуникди ам вич вичивай квахьнач. Ада виридалай вилик, приказни гуьзлемиш тавуна, душмандиз автоматдай жаваб ганай. Адан гьерекатри, буйругъри гзафбур кьиникьикай къутармишна. И кардикай хабар агакьай Руслан Примов тади гьалда куьмекдиз фена. Амма Рамиза женгинин юлдашар къутармишун патал  вичин чан къурбанднай.

Россиядин Президентдин Указдалди Рамиз Абдулнасирович Ра­ши­­доваз «Жуьрэтлувиляй» орден (кьейи­далай кьулухъ) гана. Дагъус­тан Республикадин Кьил Сергей Меликован Указдалди Тагьирхуьруьн-Къаз­майрал алай олимпийский резервдин «Самур» спортшкола Р.А. Рашидован тIварунихъ янава.

Махсус серенжемдин игитар ри­кIел хуьниз талукьарнавай турнирдиз­ тамашиз, хажалатдивди рикIел хквезва Руслан Примовни — Рамизан командир, вичиз вирида «Самур» лугьузвай, риваятрик жедай хьтин къагьриман. СВО кьиле физвай чкада ислягь агьалияр къутармишдайла ва женгера къалурай игитвилералди вири Россияда машгьур хьайи, «Жуьрэтлувиляй» кьве орден авай майор Руслан Примов. Гележегдин генерал…

2023-йисан 11-июлдиз хер хьанвай вичин аскер къутармишдайла,­ (бедендалди ам ракетадин хъип­репI­рикай кIевирна), ада эхиримжи игитвал авуна… Руслан свас це лагьанвай гада, дидедизни бубадиз авай са хва тир. Гурлу мехъериз гьазурвилер аквазвай. Лезги къилих, лезги гъейрат къалурай, жемятди лугьузвайвал, итимвал квай халкьдин хва.  РикIера хуьзва  Ибилкьасумов Рамидин, Султанов Рустам, Гьажибегов Самир, Агьмедханов Насруллагь, Тагъиев На­­зим, Шихмурадов Ислам. Гьелбетда, жуван мукьва-кьили, гъвечIи кьве аялдин буба, Испикай тир Къурбан Ферзалиев, Москвадай СВО-диз тухвай. Са шумудра залан хирер хьана, мад женгера хъхьай Къурбан рикIера хуьзва. Гьабурни уьмуьрдал ашукь жегьилар тир. Яшамиш жез кIанзавай гьабурузни. Кьисмет гьа икI хьайибурузни. Амма яшамиш жезва абур. Чахъ галаз. Чна рикIел хуьзмай кьван яшамишни жеда абур. Шагьидвалзава Хтун-Къазмайрин кьилихъ галай Самурдин милли паркуна — гуьзел чкада кьиле физвай перишан шагьвар галай, шадвал кутадай спортдин къенин вакъиади. Шагьидвалзава иниз атанвай инсанри…

Турнир тешкилайди ва адан спонсор Хтун-Къазмайрилай тир, Красноярск шегьерда яшамиш жезвай ватанперес, карчи, меценат Руслан Сабирович Талибов я. Им кьвед лагьай сефер я гьар йисуз тухудай турнир кьиле физ.

Гьуьрметлу мугьманар яз, мярекатдиз СВО-дин иштиракчийрин хизанриз теклифнавай. Меценатдин патай абуруз савкьатар гана. Гьуьрметлу мугьманрин жергеда Дагъустандин Кьил Сергей Меликован советник Эльмудин Гьамзабегов, спецназдин отряддин командир полковник Юрий Фролов, кьуд сеферда Европадин чемпион Даурен Куругълиев авай. Мярекат Мегьарамдхуьруьн райондин депутатрин собранидин председатель Назир Алиярова ачухна.

Кьве юкъуз давам хьайи акъажунра Ахцегь, Дербент, СтIал Сулейманан, Кьурагь, Сергокъала районрай, Каспийск, Подмосковьедин Мытищи­ шегьеррай тир 166 жегьил спорт­сменди заланвилин 19 категориядай иштиракна. ТIуьнар, ял ягъун пулсуз тир. Спонсордин гьисабдай.

— Турнирдин нетижайрин дуьзвилел садани шаклувал тагъун патал, — лугьузва адан кьилин судья Рустам Давудова, — чна Чечнядай тежрибалу судьяйриз теклифнавай. Вири акъажунар кьиляй-кьилиз Краснодардай теклифнавай машгьур блогер Евгений Гурова ачух эфирдай яз интернетдай къалурзавай.

Нетижаяр. 1-чкадал — Мегьарамдхуьруьн район, кьвед лагьай чкадал Белиж поселок, пуд лагьай чкадал Дербент район экъечIна. Гъалибчийриз, призерриз турнирдин кубокар, грамотаяр ва спонсордин патай пулдин премияр гана.

Хушвилелди къейд ийиз кIанзава хьи, ватанпересвилелди, мергьяматлувилин краралди машгьур хьанвай Каспийск шегьердин депутатрин соб­ранидин председатель Абдулвагьид Жаватов и сефердани къерехда акъвазнач. Ада вири чемпионриз вичин патай пулдин призар гана.

Чемпионрин арада лап хъсандиз кьуршахар кьуналди тафаватлу хьайи кьве касдиз Белиждай тир карчи Вагиф Сефербегова вичин патай пуд велосипед багъишна. Къейд авун лазим я хьи, вини дережада аваз кьиле фейи турнир вичин мураддив агакьна.

— Гьелбетда, чаз кIанзава, — лугьузва Руслан Талибова, — чи хуьрерай тIвар-ван авай гзаф спортсменар­, дуьньядин, Олимпиададин чемпионар акъатна. Амма им шартI туш. Чи мурад акьалтзавай несил мягькем сагъламвал, хъсан чирвилер авай, къастунал кIеви, гъвечIи-чIехи, пис-хъсан чидай ватанпересар яз тербия­ламишун, чIехи авун я. Наркотикривай, ичкидивай, чIуру краривай яргъаз ийин. Дуьньядин, Олимпиадайрин чемпионар жедайвал. Аквазва хьи, гьа ихьтин несил чахъ авазва. Адан патахъай къайгъударвал авуна кIанда.

Абдулафис Исмаилов