Культурадин, спортдин ва образованидин хилерай Вирироссиядин международный акъажунра, олимпиадай­ра, конкурсра гъалиб хьайи Дагъус­тандин 40 школьникди тIатIилрин вахтунда Москвада ял яна. Ихьтин хъсан серенжем чи аялар патал, Дагъустан Республикадин Кьил Сергей Меликова кьил кутуналди, мергьяматлувилин «Иман» фондуни (регьбер — Фируза­ ­Керимова)  тешкилна.

Москвада ял ягъайбурун арада Махачкъала, Каспийск, Дербент, Буйнакск, Хасавюрт шегьеррин ва Къули, Мегьарамдхуьруьн, СтIал Сулейманан, Къайтагъ ва Ногъай районрин школайра кIел­за­вай аялар авай. Абур патал пара менфятлу прог­рамма гьазурнавай. Аялриз­ Яру майдан, Василий Блаженныйдин ибадатхана акуна. Абур Москвариумдиз­, ВДНХ-да авай космонавтикадин центра­диз, Вернадский­дин циркиниз фена. Аял­рин рикIелай Треть­яковдин галереяда акур искусстводин тарифлу суьретар, ЧIехи театрдин тамаша алатдач. Абуру гьакI машгъулатрин «Мурадрин остров» паркунани ял яна.

Москвадиз фена, ял ягъуни, адан лап гуьзел чкайрихъ галаз таниш хьуни аялрин гьевес мадни хкажда, абуруз цIийи гъалибвилер къазанмишдай къуватар ­гуда.

Чи мухбир