ЦIийи санкцияр

Европадин союздин уьлквейри (Венгриядин иш­ти­­раквал авачиз) Россиядиз акси цIийи санкцияр­ кардик­ кутадай рекьер жагъурзава. «РИА Новости» чешмедин­ делилралди, Венгриядин патай разивал авачиз, амай уьлквейри санкцияр кардик кутунин гьакъиндай 6 дип­ло­матди санал авур кIвалах тестикьарнава. Абурун фикирдалди, Европадин уьлквейрикай гзаф паюни Рос­сия­диз акси цIийи санкцияр кардик кутунин тереф хуьзва.

США-дилай гзаф

Украинадиз гузвай куьмекдин кьадардал гьалтайла, Европадин союзди США-дилай ахлуднава. И кар Трамп США-дин кьиле акъвазайдалай кьулухъ хьана. Идакай Киль шегьерда авай дуьньядин экономикадин институтди хабар ганва.

«Дональд Трамп США-дин президентдин къуллугъдив эгечIайдалай кьулухъ Америкади гузвай куьмекар акъвазарна. Я военный, я такьатрин, я гуманитариядин рекьяй куьмекар гуз аквазмач», — лагьанва гьахъ-гьисабдин чарара.

Институтдин делилралди, ЕС-дин уьлквейри Украинадиз, санлай къачурла, 138 миллиард евро ганва. США-ди авур куьмекрив гекъигайла, им 23 миллиард евродин гзаф я.

Идалай вилик Пентагондин кьил П. Хегсета ЕС-ди Киевдиз гузвай куьмекар артух жезвайдакай лагьанай.

ПВО-ди тергна

15-апрелдиз РФ-дин оборонадин министерстводи хабар гайивал, алатай са йифен муддатда Курскдин областдин винел чи ПВО-ди Украинадин 109 беспилотник тергна. Санлай къачурла, и йифиз Россиядин регионриз Украинадай ахъаяй 115 беспилотникдин вилик пад кьуна: Курскдин, Воронеждин, Москвадин, Брянскдин ва Орелдин областра.

Часпарар гьисаба кьунва

Эрменистандини Азербайжанди сада-садан час­парар тестикь хьанвайбур яз гьисабнава.

Эрменистандин МИД-дин кьил А. Мирзояна Туьркиядин NTV телеканалдиз малумарайвал, Еревандинни Бакудин арада кутIундай ислягьвилин икьрардин текст тарихда амукьдай важиблуди я. «Эрменистандини Азербайжанди гьарда вичин мулкарин битаввал меслятдалди тестикьарна», — лагьана Мирзояна. Алава хъувурвал, ихтилат, Советрин Союз чкIайла, Совет­рин Социалистический республикайрин арада аваз хьайи часпаррикай физва.

Гьа са вахтунда ада кьве уьлкведин арада жезвай ислягьвилин икьрардал мус ва гьина къулар чIуг­вадатIа малумарнач. Амма и жигьетдай меслятар ийи­дай къастар ава.

Агъуз аватун мумкин я

Швейцариядин UBS Group банкунин векилри къейд­завайвал, Д.Трампа тайинарнавай алишверишдин пошлинаяр себеб яз, алай йисуз Китайдин экономика 4 процентдин кьван агъуз аватда. Пешекаррин фикирар «Bloomberg» чешмеди раижнава.

Алишверишдин крар кIеве гьатуни Китайдай къецепатаз акъудзавай метягьрихъ галаз алакъалу месэлада четинвилер арадал гъида. Чешмеди къейдзавайвал, Швейцариядин банкунин пешекарри виликамаз ганвай къимет виридалайни умудсузди я.

Урус манийриз яб гузва лугьуз

Украинадин кьиблепатан Николаев шегьерда элликлух чкада урус манийриз яб гайи руш полициядин къуллугъчийри кьуна. Идакай «РИА Новости» чешмеди хабар гузва.

Къейдзавайвал, маса юлдашрихъ галаз санал урус манидихъ яб акалай руш административный жавабдарвилиз чIугвада. «Ватандашри халкь алай чкадал автомобилда урус манидарри тамамарзавай манийрихъ яб акалзавай. Райондин полициядин къуллугъчийри къайда чIурай агьали тайинарна. Ам областдин центрадин 37 йисан яшда авай агьали я. Гуьгъуьнлай ада авур чIуру гьерекат ички хъунин таъсирдик кваз хьайиди я лагьана», — кхьенва соцсетра раижнавай малуматда. Нетижада «ГъвечIи женжелвал» статьядай административный протокол туькIуьрна.

Аквазвайвал, Украинадин миллетбазрин «къанунар» себеб яз, анин агьалияр урус манийрихъ анжах чинеба яб акалуниз мажбур жезва.

Гьазурайди — К. Ферзалиев