19-апрелдиз Дербентда, Лезги театрдин дараматда, халкьдин милли «Лезги гъед» премия вахкуниз талукьарнавай шад мярекат кьиле фида. Ам нянин сятдин 5-даз гатIунда.
Къейд ийин хьи, «Лезги гъед» премия арадал гъанвайди ва къадим шегьерда мярекат тешкилзавайди лезгийрин милли медениятдин федеральный дережадин автономия (ФЛНКА) я. Ихтилат физвай премия чи халкьдин меденият, эдебият, яшайишдин маса хилер вилик тухуник чIехи пай кутазвай, мергьяматлувилел машгъул жезвай, вири халкьдиз талукь хийирлу крар ийизвай ватанэгьлийриз гузва. Сад лагьай сеферда и премия Москвада ФЛНКА-дин 25 йис тамам хьуниз талукьарнавай юбилейдин мярекатдин сергьятра аваз вахканай.
Дербентда кьиле фидай лезги медениятдин милли межлисда чи халкьдин машгьур векилри, районрин, шегьеррин кьилери, депутатри, илимдин, яратмишдай, жемиятдин интеллигенциядин векилри иштиракда. Мярекатдин сергьятра аваз лезги манидарри, кьуьлердайбурун коллективри вижевай концертни къалурда.
«Лезги газет»
