Газетдин алатай нумрада хабар гайивал, Хив райондин Цлахърин хуьряй Ватандин ЧIехи дяведа 53 касди иштиракнай. Абуру Кавказ, Новороссийск, Крым, Поволжье, Курск, Харьков, Орел, Донецк, Севастополь, Минск шегьерар патал душманрихъ галаз къати женгер тухвана.

И макъалада чаз дяведа телеф хьайи са шумуд цлахъвидин тIварар кьаз кIанзава.

Алимет Абдулаев. Ам 1918-йисуз Цлахърин хуьре дидедиз хьана, 1941-йисуз Хив райондин военкоматдай (РВК) дяведиз фена, лишанчийрин 45-нумрадин бригадада къуллугъна. 1942-йисан 14-майдиз Новгороддин областдин Старорусскдин район патал кьиле фейи женгера телеф хьана. Адан сур гьа областдин Большое Стречно хуьруьн патарив гва.

Азиз Абдулселимов. 1911-йисуз дидедиз хьана­, 1942-йисуз Хив РВК-дай дяведиз фена. 1944-йисан 19-февралдиз Крым патал кьиле фейи женгина чан гана. Адан сур Керчь шегьерда ава.

Абдул Абдулаев. 1918-йисуз дидедиз хьана, 1941-йисуз Хив РВК-дай дяведиз фена. Сиедлицада фашистрихъ галаз дяве тухудайла, ам душмандин есирвиле­ гьатна. 1942-йисан 30-сентябрдиз есирда гьатнавайбур авай лагерда жазайрик кьена. Сиедлицада кучукнава.

Алимурад Гьажимурадов. 1907-йисуз дидедиз­ хьана. 1941-йисуз Хив РВК-дай дяведиз фена, лишан­чий­рин 509-нумрадин полкуна, 236-нумрадин лишанчийрин дивизияда къуллугъна. 1943-йисан 28-августдиз Харьковдин областдин Чугуев райондин госпиталда кьена. Ам Граково хуьруьн сурара кучукнава.

Къарабег Исабегов. 1907-йисуз дидедиз хьана. 1941-йисуз Хив РВК-дай дяведиз фена. Ада лишан­чий­рин 306-нумрадин полкуна, 62-нумрадин диви­зияда къул­лугъна. 1943-йисан 14-августдиз Калугадин ­областдин Спас-Демендин район патал тухвай женгина телеф хьана. Адан сур Березово хуьруьн сурара ава.

Къазимегьамед Мегьамедов. 1921-йисуз диде­диз хьана. 1941-йисуз Хив РВК-дай дяведиз фена. 1942-йисан, 9-февралдиз Донецк патал кьиле фейи женгина кьена. Адан сур Артемован райондин Федоровка хуьруьн патав гва.

Илхас Мирагьмедов. 1906-йисуз дидедиз хьана. 1941-йисуз Хив РВК-дай дяведиз фена. Донецкдин областдин Артемован район патал тухвай женгера душмандин гуьлле галукьна, 1942-йисан 15-апрелдиз телеф ­хьана.

Жабраил Муртузалиев. 1909-йисуз дидедиз хьа­на. 1941-йисуз Хив РВК-дай дяведиз фена. Ада лишанчийрин 287-нумрадин полкуна, 25-нумрадин дивизияда къуллугъна. 1942-йисан 20-февралдиз 47-нумрадин госпиталда хирерикди кьена. Адан сур Севастополь шегьерда ава…

Дяведиз фейи цлахъвийрикай 20 кас набутар яз хайи хуьруьз хтана. Абурун арадай Абдулаев Жарулагьа, Абдулаев Салигьа, Абдулаев Сейфулагьа, Абукаров Вилиди, Къарибов Исмаила ва муькуьбуруни уьл­кве гуьнгуьна хтун патал яшайишдин жуьреба-жуьре хилера гьакъисагъвилелди зегьмет чIугуна.

1942-йисан 18-февралдиз Хив РВК-дай Яру Армия­дин жергейриз къуллугъ ийиз фейи Исмаил Къарибова пияда кьушунрин 182-нумрадин дивизияда, Кеферпатан Кавказдин фронтда, пулеметчик­рин отделенида командир яз къуллугъна.

Краснодардин крайда Крымский район патал кьиле фейи женгина  душмандин цIай гузвай дзот вичин пулеметчикрин гьунарралди Къарибов Исмаила терг­най. Нетижада Советрин Союздин аскерриз виликди фидай рехъ ачух хьанай. И женгина кьегьал цлахъвидин  кIвачер гуьллейри кукIварнай, гена гуьгъуьн­лай госпиталра сагъар хъувуна. НКО-дин 336-нумрадин приказдалди ам дяведин инвалид яз хайи хуьруьз ­хтанай. И.Къарибов Ватандин дяведин ордендиз, «За боевые заслуги», «За отвагу» медалриз лайихлу ­хьана.

1941-1945-йисара Ватан патал дяведин ва зегьметдин фронтра викIегьдаказ иштиракай 70 касдилай виниз­ цлахъвияр гьукуматдин патай цIудралди орденризни медалриз, грамотайриз лайихлу хьана. ЧIехи Октябрдин инкъилабдин, Ватандин ЧIехи дяведин гъалибвилерин экуьник акатай цлахъвияр яшайишдин вири рекьерай йигин камаралди виликди фена.

Рамазан  Велибегов,

тарихчи