Гьуьрметлу кIелзавайбур! “Лезги газетдин” алай йисан 35-нумрадиз акъатнавай  Векил Тархарован  “Чуьнуьхун яни, тахьайтIа…” макъала куьне кIел тавуна амач ­же­ди. Ана авторди, редакциядиз ша­­ир Саират Агьмедпашаевади зенг авуна, алай йисан 24-нумрадиз вичин са рубаи зи тIвар алаз акъатнавайдакай хабар гайиди къейднавай.

Дугъриданни, гьакI я.Саиратан ва зи рубаийрин рифмаяр тикрар жезва. За инкарзавач, шиирар кхьиз геж гатIуннатIани, шииратдал фадлай ашукь я. Заз хейлин шаиррин чIалар хуралай чида, гьам урус, гьамни лезги. Гьа барадай яз Омар Хайяман, Саиратан рубаиярни.

Бязи авторрин эсерар кIелдай­ла, абурай жуван фикирарни аквада. Ахьтин чIалар, зегьметни къачун тавуна, регьятдиз рикIел аламукьда. Ихьтин дуьшуьшра акахьунни, за кьатIузвайвал, тажуб жедай кар туш.

Аваррин машгьур гьикаятчи, “Дагъустан” РГВК-да авар передачайрин редакциядин редактор хьайи, жегьил яз рагьметдиз фейи Гъазимегьамед Галбацова са интервьюда вичи сифтедай шиирар кхьейдакай, гуьгъуьнлай гьикаятдал эля­чIай­дакай малумарнай. Шииратдивай къерех хьунин себеб вуч я лагьана хабар кьурла, ада вичивай Расул Гьамзатован шиирриз тешпигьбур кхьин жезвайдакай лагьанай.

За “Лезги газет” кIелзавай­бу­рувай ва Саиратавайни зи рубаидин рифмаяр тикрар хьун чуь­нуь­хун туширди яз гьисабун тIа­лаб­зава.  Кьуд  цIарцIикай  ибарат  ру­баиди  заз гъайи машгьурвал, къазанжи, ­хийир авачирдини квез  чизва, гьуьрметлу кIелзавайбур. Зун а ру­баи акъатдалдини Марьям Алискерова тир.

Заз чарадан цIарни кIандач.

Заз гьарамдин тварни кIандач.

Алискеррин Марьям я зун,  

Заз лайихсуз тIварни кIандач.

Марьям Алискерова, Хив райондин  Хъукьварин хуьр