25-августдиз Белиж поселокдин 1-нумрадин мектебда азаддиз кьуршахар кьунай дуьньядин чемпион хьанвай лезги хва Шамил Мамедов шад гьалара къаршиламишна.
Мярекатда школадин директор Имара Заловади, муаллимри, аялри, тIвар-ван авай спортсменри, и цIарарин авторди ва масабуру иштиракна.
Шамил Мамедова 2017-йисуз Белиждин 1-нумрадин СОШ акьалтIарна. Мектебда кIелзавай йисара ам тренер Мингьажудин Къазиеван гуьзчивилик кваз азаддиз кьуршахар кьунал машгъул хьана. 2018-йисуз Шамил ДГПУ-дин физкультурадин факультетдик экечIна. Алай вахтунда ам 4-курсунин студент я.
Спортдин рекье сад лагьай агалкьун Ш.Мамедова 2018-йисуз Москвада кьиле фейи Россиядин кIвенкIвечивилин акъажунра къазанмишна. Гуьгъуьнлай адакай жуьреба-жуьре турниррин гъалибчи хьана. Алай йисан эвел кьилера Ш.Мамедова нубатдин сеферда Россиядин чемпиондин тIвар къачуна.
Мукьвара Уфада азаддиз кьуршахар кьунай кьиле фейи дуьньядин чемпионатда чи ватанэгьилиди 1-чка кьуна. Чемпиондин гафарай малум хьайивал, ада сифте Къазахстандин, ахпа Индиядин, Канададин, Ирандин пагьливанрихъ галаз са шумуд бягьс кьиле тухвана. Финалда гьасиррал Азербайжандай тир Зеритдин Байрамовахъ галаз экъечIун кьисмет хьана.
— Ам викIегь тир, — лугьузва Шамила. — ГьакI ятIани, четиндиз кьиле фейи бягьсина за ам кIаник кутуна.
Шамил Мамедова алай вахтунда вичихъ галаз кIвалахзавай тренерар тир Жамал Алиеваз ва Вагъиф Къазиеваз сагърай лугьузва.
Чнани чи викIегь ватанэгьлидиз дуьньядин чемпиондин тIвар мубаракзава! Мадни еке агалкьунар хьурай!
Къагьриман Ибрагьимов
