Жуван и макъала зи диде-бубадин насигьатдин са келимадилай башламишин. — Хъсанвал авуна, циз гадара — ам квахьдач, ви патав хкведа.
Дагъустан дегь девиррилай инихъ мугьманпересвилелди, регьимлувилелди машгьур я, инсанпересвал дагъвийрин кар алай къилих я. Инсандин и ерийри мергьяматлувални арадал гъизва.
Алай вахтундани кьилдин ксари чпин мергьяматлувилин камар къачузва. Манидарри мергьяматлувилин концертар гана къазанмишай такьатар куьмекдин гьар жуьре фондариз гузва. Муькуь спонсорри аялрин интернатриз, яшлубурун кIвалериз, школайриз куьмекзава.
Алай девирда школайризни четин я. Спонсорвилин куьмекди са жерге месэлаяр гьялунин карда гъил кьазва, гьикI хьи, са гъвечIи кIвалах авун патални такьатар герек я.
Приморский хуьруьн школани мергьяматлу ксари фикир тагана тазвач. Чаз школа эцигай ксарни майдандиз экъечIнай, гележегда куьмекар гудайбурни ава. Гьар нелай хьайитIани мергьяматлувилел машгъул жез алакьдач. Вучиз лагьайтIа, им са сеферда гъил, рикI ачухна куьтягь лагьай гаф туш эхир. Мергьяматлу кас гьамиша гьахьтинди яз амукьда.
Мирзагъаев Каир Жаферович цIийи девирдин, дериндай фикирзавай, гъвечIи ватан рикIелай алуд тийизвай инсан я. Ам Бакуда дидедиз хьана, аял вахтар Дагъустанда, Филерин хуьре акъатна. РИИЖТ-да кIелна. 2008-йисалай Дондал алай Ростовда “Первая грузовая компания” АО-дин отделдин начальник я.
Каир руьгьдай вичин ватандиз акьван мукьва я эхир, ада Мегьарамдхуьруьн райондин Приморский хуьре яшамиш жедай кIвал эцигнава. Гьар йисуз ял ягъун патал ам къецепатан уьлквейриз ваъ, Женнетдин пипIез ухшар иниз — Самур тамун къужахдиз, Каспий гьуьлуьн къерехдал хквезва. Школадин месэлаяр лагьайтIа, адаз гъвечIи вахтундилай мукьва я. Каир Мирзагъаев Бакуда гьуьрмет къазанмишай математикадин муаллимар тир Завижат Алиевнадин ва Жафер Гьажиагъаевичан хизанда чIехи хьана.
Приморский хуьруьн школадиз ада вахт арадай физ гьар жуьредин куьмекар ийизва. Месела, урус чIаланни литературадин кабинетдиз ноутбук, принтер, сканер, проектор гана ва икI мад.
Чи школа цIийиди ятIани, материалринни техникадин база зайиф я. Государстводивай вири идарайриз бес кьадар куьмек ийиз жезвач.
Чна, Приморский хуьруьн школадин вири коллективди, гьуьрметлу Каир Жаферовичаз ийизвай куьмекрай сагърай лугьузва. Куьне ийизвай хъсанвилери квез бегьер гурай. Хъсан крар фикир тагана амукьзавайди туш, абур куьмек герекзавайбур патал рехъ къалурзавай маякар хьиз я. Чун умудлу я, куьне ийизвай мергьяматлувилин кIвалахар амайбур патал чешне жеда. Сагърай!
М.М. Ашурбегова,
Мегьарамдхуьруьн райондин Приморский хуьр
