Агъа СтIалдал яшайишдин кIвале хсуси музей арадал гъанвай Аседулаев Алимегьамедаз Сулейман-Стальский райондин кьил нариман Абдулмуталибов ва райадминистрациядин бязи жавабдар къуллугъчияр мугьман хьана.

Экспонатрихъ галаз таниш хьайидалай кьулухъ райондин кьили абурун гьар садан важиблувал къейдна.

— Чаз чи тарих кIан хьана ва адаз гьуьрметна кIанда. Алимегьамед Ферзилаевич хьтин ксари тарих хуьнин карда жегьилриз чешне къалурзава, — лагьана Н. Абдулмуталибова.

Хсуси музейда зегьметдин алатар, яракьар, гьар йикъан шейэр, парталар, куьгьне шикилар, хъенчIин, ракьун шейэр ва гзаф маса затIар ава. Ина вири санлай 1100-далай гзаф экспонатар ава. Абур са шумуд йисуз Дагъустандин гзаф хуьрерай кIватIнавайбур я. Экспонатрин арада Куьредин эхиримжи хан хьайи Юсуф хандин шейэрни ава.

«Лезги Газет»