Чи ватанэгьлияр — гьар сана

Алай вахтунда Белоруссияда яшамиш жезвай чи ватанэгьли Алим  Селимов  вирибуруз сейли ва машгьур пагьливан я. Адакай­ грекринни римлуйрин жуьреда кьур­шахар кьунай кьве сеферда (2005, 2011) дуьньядин чемпион хьана.

Алим Селимов 1983-йисан 26-январдиз Сулейман-Стальский райондин Кьасумхуьрел Максиман хизанда кьуд лагьай велед яз дидедиз хьана. Адан аял вахтар регьятбур хьанач: Алим вад йисан яш­да авайла, буба рагьметдиз фе­на. ГъвечIи стхадиз тербия гу­нин, ам кьегьалвилелди чIехи аву­нин месэла хиве гьатай чIехи стхади лайихлувилелди и кар кьилизни акъудна. Вич тренер-насигьатчи  яз, чIехи стхади Алим аялзамаз кьуршахар кьунал машгъуларна. Спортдилай гъейри, Алима аялрин художественный (шикилар чIугу­нал адан рикI исятдани ала) ва му­зыкадин мектебдани ада вич бажарагъ авай аял тирди къалурна­.

КIуьд йисан яшда авай чIава­лай ам кIевелай азаддиз кьуршахар кьунал машгъул хьана. Кьасумхуьруьн мектебда 9-класс куь­тягьай­далай кьулухъ гележегдин маш­гьур пагьливан Махачкъалада кардик квай республикадин промышленностдинни экономикадин 1-нумрадин колледждик экечI­на. Студентвал авур йисарани ам спортдин акъажунрикай садрани хкечIнач. Жаванрин арада адакай Дагъустандин чемпионни хьана, Россиядин дережада кьиле фейи кIвенкIвечивилин акъажунра иштиракна. Пулдин жигьетдай къаюмвалдайбур тахьайвиляй ам гзаф четинвилерални ацалтна. РикIин мурадар кьилиз акъудун патал четин уламрайни имтигьанрай экъечI­дай мумкинвилерни хьана кIанзавай.

Алакьунар авай жегьилдиз спортдин гегьенш майданриз экъечIдай мумкинвилер хьун патал адан дустуни Гомелдин областдин Мозырь шегьердиз фин теклифна. И шегьерда Алиман дустунин халуди — дагъустанви М.Эскендарова — грекринни римлуйрин жуьреда кьуршахар кьунай тренервиле кIвалахзавай.

ИкI, кьисметди А.Селимов Белоруссиядиз акъудна, ина ада М.Эскендарован гъилик кьуршахар кьунай вичин устадвал мадни хкажна. Сифтедай Алима Белоруссияда акъвазуникай фикирнавачир, амма М.Эскендарова адаз Мозырдиз куьч хьун теклифна ва гуьгъуьнлай вичелай алакьдай куьмекарни гана.

1999-йисалай ам цIийи тренердихъ галаз олимпиададин резерв патал кьуршахар кьунай жегьил пагьливанар гьазурдай Гомелдин махсус мектебда спортдал маш­гъул хьана. Гьеле Дагъустанда амаз нубатдин са акъажунра иштиракайла, адан бедендиз тIарвал хьанай, гуьгъуьнлай и тIарвили ви­чикай хабар гайивиляй Алим азаддиз кьуршахар кьунин жуьре кьулухъ туниз ва грекринни римлуйрин жуьредал элячIуниз мажбур хьана. Са кьадар чIавалай ам “спортдин жуьредай тренер” пешедай олимпиададин резерв патал пагьливанар гьазурдай Гомелдин гьукуматдин училищедик экечIна.

Белоруссиядин хкягъай дестедик кваз 2005-йисуз чи ватанэгьлидикай грекринни римлуйрин жуьреда кьуршахар кьунай дуьньядин чемпион хьана. Къейд ийин, дуьньядин дережада гъалибвал къачунин бягьсина Алимахъ галаз къу­ватар алцумайди олимпиададин чемпион Алексей Мишин тир. Грекринни римлуйрин жуьреда кьуршахар кьунай милли командадин спортсмен-инструктор яз, 2006-йисуз чи ватанэгьли “Зегьметда къазанмишнавай агалкьунрай” медалдиз лайихлу хьана.

2009-йисуз ада Ф.Скоринадин тIварцIихъ галай Гомелдин гьукуматдин университетдин физкультурадин факультет куьтягьайдалай кьулухъ армиядин жергейрани къул­лугъ кьилиз акъудна. Гуьгъуьнлай ада Гродненский госуниверситетдин тарихдинни социологиядин факультетдани заочнидаказ кIелна.

2011-йисуз Стамбул шегьерда кьиле фейи дуьньядин чемпионатда ада кьвед лагьай сеферда яз гъалибвал къачуна. КьетIендаказ къейд ийиз кIанзава, Алим Селимов спортдин и жуьредай дуьньядин чемпионвилин тIвар къачунвай сад лагьай дагъустанви я.

Спортдин рекье къазанмишнавай зурба агалкьунриз килигна чи ватанэгьлидиз 2012-йисуз Белоруссиядин спортдин лайихлу мастервилин тIвар гана. 2011-йисан не­тижайриз килигна адакай Белоруссиядин лап хъсан спортсмен хьана­.

2015-2018-йисара ада Минскда “Динамо” футболдин клубдин генеральный директорвиле кIвалахна, 2018-йисалай — “Динамо-Брест” клубдин футболдин академиядин директорвиле.

Машгьур пагьливандихъ агалкьунар мадни гзаф ава: военныйрин арада кьиле фейи дуьньядин чемпионатда буьруьнждин сагьиб, Белоруссиядин чемпион (2002), Польшадин чемпион (2003) ва масабур.

Ватанэгьлидин хизанда кьве аялдиз тербия гузва. Дагъустандихъ, хайи хуьруьхъ галаз ада ала­къаяр атIанвач. Гьина аватIани, къуй гьар са ватанэгьлидихъ агалкьунар хьурай!

«Лезги газет»