Алакъаяр гегьенш жеда
Россиядинни Кеферпатан Кореядин регьберар ДВФУ-да (Дальневосточный федеральный университет) гуьруьшмиш хьана. Идакай “Новости” РИА-ди хабар гузва.
Гуьруьшдин сифте кьиляй Владимир Путинани Ким Чен Ына журналистар патал куьруь баянар гана. Путина къейд авурвал, кьве уьлкведин векилар и гуьруьшдин гьакъиндай фадлай икьрар хьанвай. “Инанмиш я, куьн Россиядиз мугьман хьуникди кьве терефдин алакъаяр гегьенш жеда, виликдини фида”.
Россиядин регьбердин гафарай, гуьруьшди, Кореядин полуостровдал гьалар гьи жуьреда пайгардик кутун лазим ятIа, саналди вуч ийиз ва исятда кьиле физвай гьерекатрин тереф хуьн патал Россиядивай гьихьтин куьмек гуз жедатIа, гьа месэлаяр тайинардай мумкинвал гуда. “Гьелбетда, алишверишдинни экономикадин, гуманитарный алакъаяр вилик тухун патал кьве терефдини гзаф крар кьилиз акъудна кIанда”, — алава хъувуна В.Путина.
Къейд ийин, РФ-дин ва КНДР-дин регьберрин арада сифте суьгьбет анжах кьве таржумачидин иштираквал аваз кьиле фена.
Чин кIевирун къадагъа авуна
Шри-Ланкадин президент Майтрипала Сирисенади инсандин чин акуниз, яни ам вуж ятIа тайинаруниз манийвалдай хьтин парталар алукIун къадагъа авунин гьакъиндай къарардал къул чIугуна. Идакай “News 1st” чешмеди хабар гузва.
Къейдзавайвал, къадагъа авунин къанун 29-апрелдилай къуватда гьатнава. Ихьтин серенжем, Шри-Ланкада са шумуд теракт арадал атунихъ галаз алакъалу яз, гележегда уьлкведа гьалар къайдадик кутунин мураддалди кьабулнава.
21-апрелдиз Шри-Ланкада уьлкведин тарихда виридалайни еке терактар хьана. Коломбо, Негомбо ва Баттикалоа шегьерра муьжуьд хъиткьинун арадал атана, гьа жергедай яз — мугьманханайрани, килисайрани. Хъиткьинунар хьуникди кьейибурун кьадар сифтедай 359 касдив агакьнаваз гьисабна, амма гуьгъуьнлай телеф хьайибурун кьадар, духтуррин гъалатI яз, артухарнавайдакай малумарнай. Эхиримжи делилралди, мусибатдин терактрин нетижада 250-дав агакьна инсанар кьена.
Регьятардайвал я
Россияди гележегда Украинадин агьалийриз Россиядин гражданвал регьят къайдада гуз жедайвал авунин месэладикай фикирзава. Идакай, “Новости” РИА-ди раижзавайвал, РФ-дин Президент В.Путина малумарна.
“Чна анжах ЛНР-да, ДНР-да яшамиш жезвайбур патал ваъ, санлай Украинадин ватандашриз регьят къайдада чи уьлкведин гражданвал къачудай мумкинвал гуникай фикирзава”, — лагьана В.Путина, Пекиндиз финин нетижайрин пресс-конференциядал.
24-апрелдиз Россиядин регьберди Донецкий ва Луганский республикайрин кьилдин районрин агьалийри Россиядин паспорт къачунин месэла регьятарунин гьакъиндай къарар акъудна.
Ислягьвилелди
Украинада президентдин сечкийра гъалиб хьайи Владимир Зеленскийди вич Россиядин терефдихъ галаз суьгьбетар кьиле тухуз гьазур тирдакай малумарна. Ихьтин келимаяр сиясатчидин командадин TeIegram-каналда чапнава.
Зеленскийди къейднавайвал, Украинадихъ галаз военный ва экономикадин рекьерай къурху гудай чIалалди рахун лазим жезвач. Адан фикирдалди, Минскдин икьрарар, Донбассда гьалар пайгардик кухтунин месэлаяр ислягьвилелди веревирдна кIанзава.
Сиясатчиди умуд кутунвайвал, мукьвара кьиле фидай гуьруьшдал Россиядин терефди кьве уьлкведин арада алакъаяр хъсанарунин кардиз гьазур тирди къалурда. Адан фикирдалди, Донбасс ва Крым тамамвилелди оккупациядин гьалдай акъатайла, гьа чIавуз гьалар къайдада гьатда.
Идалай вилик Россиядин Президент В.Путина вич В.Зеленскийдихъ галаз Минскдин икьраррин ва Донбассда авай гьаларин гьакъиндай веревирдер ийиз гьазур тирдакай малумарнай. Сифтедай Зеленскийди вичиз Путинахъ галаз кьилди ваъ, РагъакIидай патан уьлквейрин векилрин иштираквални аваз гуьруьшмиш жез кIанзавайдакай лагьанай.
Трампан теклиф
“Fox News” телеканалдиз интервью гудайла, США-дин президент Д.Трампа ядерный яракьдиз аксивал къалурна.
“За Путина Ким Чен Ыназ Кеферпатан Кореядиз куьмек гудай мумкинвал хьунал шадвалзавайдакай малумарай гафарихъ яб акална. Чаз вирибуруз ядерный яракьдикай къерех жез кIанзава, чун адакай къерех хьун герек я. Россияни, Китайни къерех хьун лазим я”, — лагьана США-дин регьберди.
15-мартдиз Кеферпатан Кореядин кьили США-дихъ галаз ядерный яракьрин кьадар тIимиларунин гьакъиндай ихтилатар акъвазарунин месэладиз килигунин мумкинвиликай малумарнай. КНДР-дин МИД-ди тестикьарзавайвал, Пхеньяндиз США-дин истемишунрилай гъил къачудай ният авач.
Гьазурайди — Куругъли Ферзалиев
