Лукашенкодин фикир

Белоруссиядин президент Александр Лукашенкоди Брестский областдин воен­ный рекьяй вердишвилер къа­чудай полигондиз фейила малумарна хьи, эгер дяве ара­дал атай­тlа, республикадин вири агьалияр яракьдалди таъминарда. Идакай “lenta.­ru” чешмеди хабар гузва­.

“За зарафат квачиз лагьанай хьи, эгер чаз яракьар (автоматар, тапанчияр, пулеметар ва абуруз герек женгинин суьрсетар) бес кьадарда аваз хьайитlа, Аллагьди яргъазрай, дяве къара­гъайтlа, чна гьар са хизандив яракьар вугуда. Аялар саламат чкадиз акъуд­на, чна вирида санал ватандин сергьятар хуьда”, — лагьана Белоруссиядин регьберди.

Ада алава хъувурвал, кьуьзуьбуру, гьатта дишегьлийрини: ирид миллион инсанди, чеб ва уьлкве хуьн патал ирид миллион яракь къачуда.

Лукашенкоди къейднавайвал, Белоруссиядихъ галаз дяве ийиз кlан хьайи­буруз еке зарар гунин карда виже къведай хьтин оборонадин яракьар чарасуз я. Ихтилат 300-500 километрдин яргъаз къакъатнавай чкаяр ягъиз жедай ракетай­­рикай физва. Абурни, Лукашенкоди малумарайвал, Белоруссиядихъ аваз­ва­.

Ихтияр гудач

Украинадин къецепатан крарин министр Павел Климкина кьвед лагьайди яз  Россиядин гражданвал къачузвайбуруз талукь яз уголовный жавабдарвал кардик кутун мумкин я. Идан гьакъиндай министрди “UA: Харків” телеканалда малумарна.

“Зун чи уьлкведиз аксивалзавай Россиядин ватандашвал чинеба къачузвай украинвийриз талукь месэладиз килигиз гьазур я. За фикирзавайвал, им веревирд авуна кlани ва вичихъ метлеб авай месэла я. Кьвед лагьайди яз  Россиядин ватандашвал къачунин къанундиз за кlевелай аксивал ийизва”, — лагьана П.Климкина.

Идахъ галаз сад хьиз, Климкина къейд авурвал, Россия квачиз, муькуь уьлквейрин ватандашвал къачуртlа, украинвийриз жаза гудач.

14-августдиз Верховный Рададин депутат Ю.Березади малумарнай хьи, чпихъ Россиядин паспорт авайди чуьнуьхзавай ксарихъ галаз махсус къуллугъри кlвалахунин ва ахтармишунрин не­ти­жа­да ахьтин ксар Украинадин ватандашвиликай магьрумун герек я.

Еке мажибар авай шегьерар

Россияда виридалайни еке мажибар Москвада, Салехардда, Сургутда, Ханты-Мансийскда ва Южно-Сахалинскда къачузва. Идакай “Новости” РИА-ди хабар гузва.

Рейтингда сад лагьай чкадал Южно-Сахалинск ала. Ана юкьван мажибдин кьадар 81700 манатдиз барабар я. Рейтинг туь­кlуьрайбуру юкьван мажибни адетдин продуктрин, шейэрин къиметрин кьадарар сад-садав гекъигайла гьихьтин гьал арадал къвезватlа, гьа месэладиз фикир ганва.

Кьвед лагьай чкадал Салехард, гуьгъуьнал Сургут ва Ханты-Мансийск ала. Рейтингда Москва вад лагьай чкадал хьанва.

Къейд ийин, ахтармишунар виш шегьердиз талукь яз кьиле тухвана. Эхиримжи чка Шахты шегьерди кьуна. Шахты шегьердилай гъейри, лап гъвечlи мажибар авай шегьеррин арада, чешмеди кхьизвайвал, Севастополь, Черкесск, Махачкъала ва Нальчик гьатна.

Севастополда ихьтин нетижаяр арадал атун ана шейэрин къиметар винизбур хьунихъ галаз алакъалу ийизва.

 

Кьифери тlуьна

Германиядин Штутгарт шегьердин ктабханада авай надир ктабрикай муьжуьд­ агъзур ктаб гьамбардин кьифери тlуьна. Идакай “DW” чешмеди хабар гузва.

Ктабханадин векилри ихтилатзавайвал, йисан сифте кьилерилай агъзур ктаб, гьа жергедай яз алатай асирда чапнавайбурни, гишин гьамбардин кьифе­ри жакьвалай авуна, тергна. Къейдзавайвал, 1970-1980-йисара чапдай акъат­навай илимдин ктабар, экономикадиз, юриспруденциядиз ва социологиядиз талукь илимдин кlвалахар терг хьана. Санлай къачурла, кьифери гьужум аву­нин нетижада 200 агъзур евродин зиян хьанва.

Эрекьдин къимет хкаж жеда

РФ-дин финансрин министерстводи гьазурнавай къарардин проектдин бинедаллаз, Россиядин сергьятра ку­ра-кура маса гудай эрекьдин кIанин къимет (МРЦ) 205 манатдилай 215 манатдал кьван хкажиз кlанзава. Къалурнавай къиметдин кьадар эрекьдин зур литрдиз талукь я.

Идалайни гъейри, ведомстводи гьисабзавайвал, коньяк кура-кура маса гунин къиметни 371 манатдилай 388 манатдал (0,5 литр) кьван хкаж жеда.

20-августдилай Россияда 40 градусдин туьнтвал авай эрекьдин кура-кура маса гунин къимет хкаж хьана.

Гьазурайди — Куругъли Ферзалиев