Алай йисан 12-августдиз гзаф гужлу марфар къуникди Самур вацIун яд хкаж хьанай ва нетижада ЦIийи-Каракуьре хуьруьн мулкара авай республикадин дережадин рекьин эрчIи патан бине уьцlенай.

28-августдиз ДОРСТРОЙТЕХ тешкилатдин къуватралдини такьатралди, залан техникадин куьмекдалди винидихъай улакьар фидай цIийи рехъ туькIуьр хъувунай. Амма туькIуьр хъувунвай рекьин участокда мадни хъиткьерар арадал атанвайди малум хьанва. Райондин кьил Абдурагьим Алискерова и делилдин гьакъикъат чирунин жигьетдай чкадал ахтармишдайбурун десте рекье туна. Инспекциядин дестедик райадминистрациядин ГО-дин ва ЧС-дин начальник Ренат Агъаметов ва «Сад тир информациядин центр» МКУ-дин директор Акиф Балакишиев квай. Хаталувал авай рекьин чка ахтармишайдалай кьулухъ, малум хьайивал, чилин кIаникай яд хкатунин нетижада, рекьин къерех чукlунин къурхулувал арадал атанва.

И месэладиз талукь яз райондин кьили нубатдинди тушир совещание кьиле тухвана. Анал Цlийи-Каракуьре хуьруьн администрациядин кьилиз талукь тир серенжемар кьабулун патал, кьилди къачуртlа, хаталувилик квай чка ахтармишдай жавабдар ксар тайинарунин буйругъ гана. Гьа са вахтунда А.Алискерова арадал атанвай гьалдикай лазим тир къуллугъриз хабар гун патал Р.Агъаметов тагькимарна.

«Лезги газет»