Бахтлу лотерея
Америкадин агьали Анисса Делларипадиз са доллардин къиметдик квай лотерейдин билетдай уьмуьрлух бес жедай пулдин кьадар акъатна. Идакай UPI хабаррин порталди малумарзава.
Руша хиве кьазвайвал, лотерейдин билет адаз колледж куьтягьай мярекатдал бубади пишкешнай. “Бубади заз зарафат патал гьамиша лотерейдин билетар къачузва. И билетдин къимет са доллар тир. Бубади, гьелбетда са затlни вилив хвенвачир. Кlвализ хъфейла, за билетдин михьна кlани къат алудна — зун жуван вилерин чlалахъ хьанач”, — ихтилатна 22 йисан яшда авай руша.
Сифтедай адаз и кар бубади авунвай зарафат хьиз хьанай. Амма билет халисанди тир. Лотерейдай акъатай пул вахчуз атайла, адаз 400 агъзур доллар (27,3 миллион манат кьван) санлай ва я уьмуьрдин эхирдалди вацра кьве агъзур доллар (тахминан 136 агъзурни 6 виш манат) къачун теклифна. Делларипади кьвед лагьайди хкяна. Жегьил хьуниз килигна, ада вич патал и пулдин кьадар лап гзаф яз гьисабна. Приз себеб яз, ада пул вичиз кlелун давамаруниз куьмек жеда лагьана. Руша бубадиз ихьтин пишкешдай сагърай лугьузва.
Медени уьлквеяр
ООН-ди виридалайни кьакьан дережада вилик фенвай уьлквейрин тlварар раижнава. “Инсаният вилик финин индексар ва индикаторар” доклад ООН-дин сайтда чапнава. Рейтингда 189 уьлкве ава. Абурукай 59 вини деражада, вилик фенвайбур я, 38 уьлкве агъуз дережада виликди фенвайбур я.
Къейдзавайвал, сад лагьай чка Норвегияди кьуна. Ана уьмуьрдин яргъивилин юкьван гьал 82 йисалай са тlимил гзаф я. Чирвилер юкьван гьисабдалди 12 йисуз кьван къачузва. Вилик финин жигьетдай сифте жергеда авай 10 уьлкведик Швейцария, Австралия, Ирландия, Германия, Исландия, Гонконг, Швеция, Сингапур ва Нидерландар акатнава.
Рейтингда Россия 49-чкадал хьанва. Ахтармишунрин сиягьда къейдзавайвал, виридалайни агъуз тир дережада авайди Нигер я.
Азов гьуьле — военный база?..
Украинадиз йисан эхирдалди Азов гьуьле военный база арадал гъиз кlанзава. Идан гьакъиндай Facebook соцсетда авай министррин кабинетдин официальный чина кхьизва.
“Азов гьуьле Украинадин военный къуватар артух жезва. Бердянскда Украинадин ВМС-рин артиллериядин кьве бронекатер циз ахъайнава”, — кхьенва ана. Къейдзавайвал, туькlуьрзавай база и регионда гуя РФ-ди ийизвай гьужумрин гьерекатриз акси рум гун патал чарасуз я.
Гуя Азов гьуьл гужуналди кьаз алахъзава лугьуз, Россиядик Украинади са шумудра тахсирар кутуна. Эхиримжи сеферда ихьтин тахсир кутунин гафар Петр Порошенкодини лагьана. 14-сентябрдиз The Washington Post чешмедиз гайи интервьюда Порошенкоди малумарна хьи, гуя Москва, Крым кьур хьиз, Азов гьуьлни кьаз алахънава ва и гьерекатрикди международный къайдаярни чlурзава.
Азов гьуьле Москвадинни Киевдин арада къизгъин гьалар Крым Россиядик акахьайдалай ва Крымдин муьгъ эцигна куьтягьайдалай кьулухъ артух хьана. Украинадиз Россияди гьуьлуьхъ фидай рехъ кlевириз кичlезва. Кьве уьлкведин сергьят хуьзвай аскерри са шумуд сеферда сада-садан гимияр кьуна.
Порошенкоди къул чIугуна
Украинадин президент П.Порошенкоди Россиядихъ галаз авай дуствилин икьрар акъвазарунин гьакъиндай къарардал къул чlугуна. Идан гьакъиндай адан администрациядин сайтда кхьенва.
“Украинадин милли хатасузвилин ва оборонадин советдин къарардал асаслу яз, Украинадинни Россиядин арада дуствилин, санал кlвалахунин гьакъиндай 1997-йисан 31-майдиз къулар чlугур икьрар къуватдай вегьиниз талукь яз Украинадин къецепатан крарин рекьяй министерстводи авур теклифрин тереф хвена”, — къейднава чешмеди. Верховный Радада авай президентдин векил, депутат Ирина Луценкоди къейд авурвал, парламентдин советдин ва СНБО-дин заседанийрал Украинадинни РФ-дин арада дуствилин алакъайрин икьрардин муддат артухар хъувун тавунин фикирдал разивална. Украинадин МИД-ди Москвадиз 30-сентябрдалди махсусдаказ и къарардикай хабар гуда, президентди лагьайтlа, парламентдиз талукь тир законопроект теклифда.
СНГ-дин крарин рекьяй Госдумадин комитетдин кьил Леонид Калашникова алай йисан августдиз къейднай хьи, Украинадинни Россиядин арада авай дуствилин икьрардихъ метлеб амач, гьавиляй ам чlуруникди четин месэлаяр арадал къведач.
Тахсиркар вахкана
Террористрин “ИГ” тешкилатдиз (“ИГ” Россияда къадагъа я) пулдин куьмекар гунай шак физвай, международный розыскда авай россияви Бельгияди вахкана. Идакай “Новости” РИА-ди хабар гузва.
“РФ-дин ФСБ-ди Россиядин Генеральный прокуратурадихъ, МВД-дин Интерполдин НЦБ-дихъ ва ФСИН-дихъ галаз санал вичихъ къекъвезвай Гехаева Али Абдул-Муталибович Бельгиядай Россиядиз хкунин серенжем тешкилна”, — кхьизва чешмеди.
ФСБ-дин делилралди, Гехаев 2015-йисалай Евросоюздин уьлквейра яшамиш хьана. Анрай ада Сириядин сергьятра женгерин гьерекатар кьиле тухузвай террористриз пулдин куьмекар гуз хьана. Малумарзавайвал, россияви 2017-йисан майдиз Брюсселда кьуна ва вичин уьлкведив вахкудалди дустагъда ацукьарна. 14-сентябрдиз ам Россиядив вахкана.
Августдин эхирра Грецияди Россиядив Татарстандин агьали вахканай. Сирияда террористрин жергейрик кваз женгерин гьерекатра иштиракунай адахъни къекъвезвай.
Гьазурайди — Куругъли Ферзалиев
