Зур йисуз амукьда
COVID-19 акатайдалай кьулухъ сагъ хъхьайбурун иммунитет зур йисан муддатда хъсан гьалда амукьзава. Алимрин ахтармишунрал асаслу яз, идакай Роспотребнадзордин кьил А.Поповади “Вести FM” радиодиз раижна.
Адан гафаралди, исятда авай вакцинайри инсан коронавирусдикай зур йисалайни гзаф вахтунда хуьда. Поповади къейд авурвал, агьалийрин 60 процентди вирусдиз акси рапар ягъайла, тIугъвалдихъ галаз алакъалу гьалар пайгардик ахкатда.
Ички къадагъа авунва
ЮАР-дин (Кьиблепатан Африкадин Республика) гьукумдарри коронавирус акатзавайбурун кьадар артух жезвайвиляй ички маса гунал къадагъа эцигунин ва барар кIевунин къарар кьабулнава. Уьлкведин президент С. Рамафосадин арза “The Guardian” чешмеди раижнава.
Малумарзавайвал, спирт квай затIар хъвазвай ксари чеб игьтиятсуздаказ тухузва, тIугъвалдин серенжемрал амалзавач. Нетижада вирус чукIунин гьалар йигин жезва. “Ичкидихъ галаз алакъалу яз арадал къвезвай бедбахтвилерини тIугъвалдин шартIара кIвалахзавай азарханайрин пар артухарзава”, — лугьузва ЮАР-дин президентди.
2020-йисан декабрдин вацра ЮАР-да коронавирусдин кьвед лагьай лепе пайда хьана.
ТIатIилрин йикъар артухарда
Москвадин мэр С.Собянина мектебра ва колледжра кIелзавайбур патал тIатIилар 17-январдалди давамарунин къарар кьабулнава. Идакай “Лента.ру” чешмеди хабар гана.
Адан фикирдалди, зулун тIатIилрин йикъар артухаруникди меркезда коронавирус чукIунин гьалар явашариз алакьна. Пешекарри къейднавайвал, тIугъвалдин лепе алудун патал тIатIилрин 11 югъ бес жедач.
Къейдзавайвал, уьлкведин меркезда хъуьтIуьн тIатIилар куьтягь жедалди я адетдин къайдадани, я онлайн къайдадани тарсар кьиле фидач. Шегьердин кьили гьукуматдинди тушир идарайризни кIелзавайбур тIатIилриз ахъаюн теклифзава.
Ислягьвилин заминар
Дагълух Къарабахда женгер акъвазаруниз талукь икьрарда Москвадини Анкаради заминри хьиз кьетIен роль къугъвайдакай Бакуда малумарна, хабар гузва “Новости” РИА-ди.
“Алатай йисан 10-ноябрдин икьрардихъ галаз алакъалу яз РФ-дин ва Туьркиядин роль кьетIендаказ къейд ийиз жеда. Икьрарди регионда цIийи гьакъикъат арадал гъана, ислягьвални пайгарвал таъминарна”, — малумарзава Азербайжандин МИД-ди.
Россиядин, Эрменистандин ва Азербайжандин регьберри 2020-йисан 9-ноябрдиз Дагълух Къарабахда женгер тамамвилелди акъвазарунин гьакъиндай пуд терефдин икьрардал къулар чIугуна. Икьрардин шартIуналди, къалмакъал хьайи терефар чеб кьунвай чкайрал аламукьна. Гуьгъуьнлай Бакудин гуьзчивилик мад пуд район акат хъувуна. Дагълух Къарабахдиз ислягьвал хуьн патал Россиядин векиларни фена.
Хатасузвал патал
Информациядинни аналитикадин “Telecom daily” агентстводин директор Д.Кускован фикирдалди, электричестводик кутунвай телефон ишлемишиз хьайитIа, ам хъиткьинунни мумкин я. Им са акьван мумкин кар тушиз гьисабзаватIани, пешекарди электричестводик квай макъамда телефон ишлемиш тавун теклифзава. Идакай “Прайм” чешмеди хабар гана.
Зарядкадин вахтунда гаджетдиз ифин акъатзава. Эгер телефондал махсус къаблух алаз хьайитIа, аппаратдиз кьадардилай артух ифин акъатун мумкин я. Гьавиляй, рахадайла, хатасузвал патал телефон электричестводикай хкудун хъсан я.
КицIи куьмекна
Филиппинрин Сибонга муниципалитетда иесисуз кицIи, мотоцикл гьалзавай инсан акъвазарна, гадарнавай чагъа аял алай чкадал тухвана. Идакай “Cebu Daily News” чешмеди хабар гузва.
Ампзавай кицI акурла, мотоциклистди улакь акъвазарун ва гьайвандин гуьгъуьниз фин кьетIна. КицIи инсан шегьердин зирзибилар гадардай чкадин патав гвай чуьлдал тухвана. Анал дасмалдик кутунвай, шехьзавай чагъа алай. Мотоциклистди аял вахчуна, мукьвал алай азарханадиз агакьарна. Гуьгъуьнлай ада и агьвалатдикай полициядиз хабар гана.
«Лезги газет»
