ЦIийи йисан вилик квай йикъара Каспийскда, Республикадин образованидин центрадин (РЦО) актовый залда, “Хъсанвилин ва умудлувилин югъ” лишандик кваз Ильман Алипулатован — гъвечIидан экуь къаматдиз бахшнавай мергьяматлувилин серенжем (ам тешкилнавайдини адан тIварунихъ галай мергьяматлувилин “Аялриз пакадин югъ багъишин” фонд тир) кьиле фена. Мярекатдин иштиракчийриз образованидин идарадин муаллимри ва аялри чпин гъилералди туькIуьрнавай шейэр ва гьазурнавай няметар маса къачудай мумкинвал авай. Инин гьар са классди “Пирог добра” тIвар алаз серенжемни кьиле тухвана. КIватIай пулдин такьатар онкология авай аялар сагъарун патал ДРКБ-дин гематологиядин отделенидиз гудайвал я.
Къейд авун лазим я хьи, тIвар кьунвай центрада саки вири мярекатар вич тешкилна цIи 5 йис тамам хьанвай мергьяматлувилин и фондунихъ галаз санал кьиле тухузва. Вичин тIварунихъ фонд тешкилнавай Ильман Алипулатов — гъвечIиди чIуру азардикди фад дуьньядилай фена. Амма адан экуь къамат гзаф инсанрин рикIера ама. Кьиле тухвай мергьяматлувилин серенжемдини и кардин жигьетдай шагьидвалзавай.
Мярекат башламишдалди вилик кIватI хьанвайбуруз чIехи экрандилай РЦО-дин кIвалахдикай фильм къалурна. Мергьяматлувилин серенжем ачухай РЦО-дин директор Анжела Байрамбеговади — ам виликдай Ильман Алипулатован-гъвечIидан классдин руководитель тир — тербия ва чирвилер гун ибур чIехи са къурулушдин чеб чпивай къакъудиз тежер хилер тирди, вичи регьбервал гузвай идарада кIелзавай аялрин руьгьдинни ахлакьдин тербиядиз артух фикир гузвайди, гъвечIи Ильманан экуь къамат ам чидайбурун, гьакIни адан тIварунихъ галай фондуни куьмекар гузвайбурун рикIерани амукьдайди къейдна. Идахъ галаз сад хьиз, ихьтин серенжемар кьиле тухуналди — хъсан чешне къалуруналди — аялар рикIе мергьяматлувал, чарадан гьалдикайни тIалдикай хабар аваз тербияламишиз куьмекзавайдални фикир желбна.
“Аялриз пакадин югъ багъишин” мергьяматлувилин фондунин президент, республикада тIвар-ван авай общественный деятель Ильман Алипулатов хтул дуьньядиз атай шад легьзейрикай, фонд арадал атуникай рахана.
— Инсан дуьньядал атун — им гьамиша шад вакъиа я. 22 йис идалай вилик дуьньядиз зи тIвар алай хтул атана. Ада Махачкъаладин 13 ва 1-нумрайрин школайра кIелна. Эхиримжи кьве йисуз ам залан азардикди начагъ тирла, чун сад-садаз мадни гзаф мукьва хьанвай. 2015-йисуз ам гьамишалугъ чавай къакъатна. Им гьазурвал акваз жедай кар туш. Амма, лугьурвал, Аллагьдин кьадар гьахьтинди хьана. Залан и вахтунда чи хизанди адан экуь къамат рикIел хуьнин лишан яз мергьяматлувилин фонд арадал гъунин къарар кьабулна, — рикIел хкана ада. — Ингье гила 5 йис я фондуни начагъ аялриз куьмекзава.
Гуьгъуьнлай мярекатдал рахай РД-дин дишегьлийрин Союздин председатель И.Мамутаевади, “Россиядин дидеяр” Вирироссиядин гьерекатдин ДРО-дин председатель Т.Мегьамедовади ва масабуру аялар мергьяматлувал рикIе аваз чIехи хьунин, ихьтин мярекатар кьиле тухунин важиблувал къейдна.
Мергьяматлувилин серенжемдин иштиракчияр патал “Алад, зи дуст, гьамиша хъсанвилин рекьяй алад” лишандик кваз РЦО-дин аялри хореографиядин, вокалдин ва яратмишунрин еке программани гьазурнавай. Мадни адан сергьятра аваз “Къуй къени гафуни руьгь ахварай авудрай…” тIвар алаз кьиле тухузвай яратмишунрин конкурсда, жуьреба-жуьре номинацийра гъалиб хьайи 13 аялдив шабагьарни вахкана.
Рагнеда Рамалданова
