И йикъара Мегьарамдхуьруьн райондин кьил Фарид Агьмедов Тагьирхуьруьн-Къазмайрин хуьре авай селекционер, Дербентдин селекциядин станциядин илимдин къуллугъчи Тимур Гьабибован ажайиб емишрин багъдиз мугьман хьана.
И багъди Мегьарамдхуьруьн райондин гьавадин шартIар ва берекатлу чил дуьньядин жуьреба-жуьре ажайиб емишар ва набататар битмишарун патал кутугай чка тирди нубатдин сеферда тестикьарзава. КIвалин патав гвай чилел, ачух цавун кIаник и гъвечIи багъда-оранжереяда вичин пешедал кьару селекционерди дуьньядин жуьреба-жуьре пипIерай гъанвай ва райондин тIебиатдин шартIарив лап хъсандиз кьунвай набататар гьасилзава.
Ботанический багъни адан мулкунал алай ва туристрин рикI алай чкадиз элкъвенвай музей ахтармишдайла, муниципалитетдин кьил багъдин иесидивай адаз вичин кIвалахда гьихьтин куьмек лазим ятIа хабар кьуна. Тимур Гьабибова вичиз райондин мулкунал гзаф кьадарра аваз киви гьасилдай фикир авайдакай лагьана. Хабар гузвайвал, Ф.Агьмедова и теклифдин тереф хвена.
ИкI, агрономдиз лазим хьайи са гектардин чкадал Ф.Агьмедова ажайиб культура битмишарун патал 2,5 гектар чил чара авун теклифна. “Чаз тIебиатди гузвай гуьзел мумкинвилерикай менфят къачун тавуна жедач. Чи вилик квай месэла лагьайтIа, райондин аваданвал ва хушбахтвал патал къулай шартIар тешкилуникай ибарат я”, — лагьана муниципалитетдин кьили.
Культурадикай вичикай рахайтIа, къейдна кIанда хьи, киви къиметлу, витаминралди девлетлу, гьам тIуьниз, гьамни инсанрин сагъламвал гуьнгуьна хтуниз ишлемишзавай емиш я. Набататдин ватан Китай я. Ажайиб емишдихъ аязриз дурум гудай ери ава — и набататдивай -12 градусдив агакьдалди мекьивилер эхиз жезва.
Киви гьасилунихъ хъсан маса терефарни ава. Набатат сармашух хьиз экъечIзава, яни ам битмишарун патал еке майданар лазим жезвач, гьа са вахтунда адан яргъивал 7,5 метрдив кьван агакьзава. И жуьредин багълари, амай культурайрив гекъигайла, чка кьенятдай мумкинвал гузва.
«Лезги газет»
