Коронавирус: 28-майдин рекъемар
Чи уьлкведа эхиримжи юкъуз 8371 касдик коронавирус акатна. “REGNUM” чешмедин делилралди, идан гьакъиндай Москвадин оперштабди малумарна.
28-майдин делилралди, санлай Россияда коронавирус акатнавайбурун кьадар 379 051-дав агакьнава, абурукай 4142 кас кьенва, 150 993 — сагъар хъувунва. Санлай дуьньяда лагьайтIа, 5 707 163 кас коронавирусдикди начагъ хьана, абурукай 355 956 — кьенва, 2 361 612 — сагъар хъувунва.
Хейлин пешекаррин фикирдалди, коронавирусдин винел уьлкведивай гатун эхирда гъалибвал къачуз жеда.
Китайдиз вирус хъфена
Эхиримжи йикъара Китайда коронавирус акатай цIийи дуьшуьшар дуьздал акъуднава. “Reuters” чешмедин делилралди, начагъ хьанвай кьве кас къецепатан уьлквейрай хтанвайбур я, мад са инсандик Китайдин мулкара вирус акатна.
Къейд ийин, тIугъвал пайда хьайидалай кьулухъ сифте яз Китайда 22-майдиз коронавирус акатай цIийи са дуьшуьшни хъхьанач. Эхиримжи рекъемар фикирда кьуртIа, Китайда 84 агъзурдалай гзаф ксарик коронавирус акатна. Абурукай 4 агъзурдалайни гзаф ксар кьена.
Мажибриз таъсирна
Уьлкведа коронавирус чукIунихъ галаз алакъалу яз кардик кутур сергьят эцигнавай серенжемар себеб яз саки чIехи пай россиявийрин мажибрин кьадар тIимил хьана. Идан гьакъиндай “Работа.ру” чешмеда къалурнавай делилри шагьидвалзава. Махсус ахтармишунар майдин вацра 18 йисалай виниз яшда авай 2300 россиявидин арада кьиле тухвана.
Ахтармишунрин нетижайрал асаслу яз, кIвалахдик квай 58 процент ватандашрин зегьметдин гьакъи абуруз кIвалах гайибуру агъузарнава. Хабарар кьурбурукай бязибуру чеб премийрикай магьрум хьанвайдакайни лагьана. Ватандашрикай 39 процентдин мажибар икьван чIавалди хьайи дережада аваз амукьнава. Ахтармишунра иштиракай анжах 3 процент ксари чпин мажибар хкаж хьанвайди малумарна.
Гъалибвилин парад 24-июндиз тешкилда
И йикъара РФ-дин Президент В.Путина уьлкведин оборонадин министр С.Шойгудихъ галаз кьиле тухвай совещанидал малумарайвал, Гъалибвилин парад Яру майдандал 24-июндиз кьиле фида. Идакай “ТАСС” чешмеди хабар гана.
Президентди чIехи вакъиадиз талукь гьазурвилер акун тапшурмишна. А юкъуз хатасузвал таъминарунин месэладал оборонадин министерстводин кьил С. Шойгу машгъул жеда. “Рекьин тийир полк” серенжем 26-июлдиз кьиле тухудайвал я.
Идалай вилик Госдумадин вице-спикер И.Лебедева Россиядин Конституциядик кухтазвай дегишвилериз талукь референдумни 24-июндиз фида лагьанай.
Алимрин зенд
Лондонда авай университетский колледждин алимри субутнавайвал, мукьвал-мукьвал гъилер чуьхуьнихъ коронавирус акатунин тевекул тIимилардай метлеб ава. Алимри гьар юкъуз агъа кIан ругудра гъилер запундай чуьхуьн теклифзава. Абурун зенд “Wellcome Open Research” чешмеди раижнава.
“6-10 сеферда гъилер чуьхвейтIа, им коронавирусдин вилик пад атIунин хъсан тедбир жеда”, — тестикьарзава махсус ахтармишунар кьиле тухванвай пешекарри. Алава хъийизвайвал, лап гзаф кьадарра гъилер чуьхуьни ва кьадарсузвилелди антисептикар ишлемишуни хам кьурурун мумкин я.
ЕГЭ кьиле фидай йикъар
Россияда 29 ва 30-июндиз проб патал тир гьукуматдин имтигьанар (ЕГЭ) кьиле фида, асас имтигьанар 3-июлдилай башламишда. «ТАСС» чешмедин делилралди, тестикьарнавай йикъар РФ-дин просвещенидин министр С.Кравцова раижна.
Министрдин гафаралди, сифте эдебиятдай, географиядай ва информатикадай имтигьанар вахкуда. Вузрик экечIиз кIанзавайбуруз талукь имтигьанар 3, 5, 7 ва 8-августдиз тешкилдайвал я.
Гьукумат цIийи ийида
Белоруссияда президентдин сечкияр кьиле фейидалай кьулухъ цIийи гьукумат (правительство) жеда, малумарна республикадин кьил А.Лукашенкоди. Адан гафар «Пул Первого” тelegram-каналди раижна.
Къейднавайвал, президентвиле къуллугъзавайди мукьвара кьиле фидай президентдин сечкийрин кандидатвиле регистрация авурдалай кьулухъ, гьукумдарри гьамиша гьукумат цIийи авун адетдиз элкъвенва. “Им инсанриз чна нихъ галаз кIвалахзаватIа чир хьун патал кьилиз акъудзавай лап чарасуз месэла тир”, — гъавурдик кутуна Лукашенкоди.
Белоруссиядин президентдин сечкияр цIи 9-августдиз кьиле фида. А.Лукашенко 1994-йисалай Белоруссиядин регьбер я.
«Лезги газет»
