Дагъустанда коронавирусдихъ галаз женг тухун патал медицинадин 3 центр эцигуниз Урусатдин Гьукуматди 2 млрд манат пул чара ийида. Идакай хемис юкъуз кьиле фейи заседанидал РФ-дин премьер-министр Михаил Мишустина хабар гана.
Къейд ийин хьи, центраяр Каспийскда, Хасавюрт райондин Ботаюрт хуьре ва Дербентда эцигзава. Эцигунрин кIвалахрал РФ-дин оборонадин министерстводин пешекарар желбнава.
* * *
РД-дин здравоохраненидин министерстводин пресс-къуллугъди хабар гузвайвал, Дагъустанди, Урусатдин промышленностдин ва алишверишдин программадин сергьятра аваз цIийи 6 реанимобиль маса къачунва.
ЦIийи улакьар кардиографралди, дефибрилляторралди, ИВЛ-дин аппаратралди ва тади куьмек гунин карда герек къвезвай маса тадаракралди таъминарнава.
РД-дин здравоохраненидин министр Жамалудин Гьажиибрагьимован гафаралди, реанимобилри пис гьалда авай азарлуйриз абур азарханайрив агакьардалди куьмекдай мумкинвал гуда.
РикIел хкин, са тIимил вахт идалай вилик Дагъустандиз тIугъвалдихъ галаз женг тухун патал 13 реанимобиль чара авунай.
* * *
27-майдиз Дагъустандин Кьил Владимир Васильева РФ-дин МЧС-дин кьилин заместитель Павел Барышевахъ галаз гуьруьш кьиле тухвана. Гуьруьшда республикадин премьер-министр Артем Здуновани иштиракна.
Гьа и юкъуз Махачкъалада П.Барышеван иштираквал аваз Дагъустанда авай гьалариз талукьарнавай селекторный совещание кьиле фена. Анал уьлкведин МЧС-дин кьилин заместителди республикада кар алай объектар дезинфекция авунин мярекатар давамарзавайдакай хабар гана.
* * *
Дагъустандиз и йикъара РФ-дин жуьреба-жуьре министерствойринни ведомствойрин векилар мугьман хьана. Абурун арада Урусатдин здравоохраненидин министрдин заместитель Виктор Фисенкони ава. Республикадин Кьил Владимир Васильевахъ галаз кьиле фейи гуьруьшдин вахтунда ада Урусатди Дагъустандиз коронавирусдихъ галаз женг чIугунин карда куьмек гун давамардайдакай хабар гана.
Гьа икI, арбе йикъан йифиз Дагъустандиз махсус самолетда аваз Москвадай духтуррин са десте атана. Абур Махачкъаладин аэропортуник РД-дин Кьилин ва Гьукуматдин Администрациядин Руководитель Владимир Иванова, РД-дин Халкьдин Собранидин Председателдин заместитель Елена Ельниковади ва жавабдар маса ксари къаршиламишна.
Къейд ийин хьи, Дагъларин уьлкведиз атанвай духтуррин арада хирургар, пульмонологар, инфекционистар, реаниматологар, рентгенологар ва маса пешекарар ава. Духтуррихъ галаз санал республикадиз медицинадин препаратар, коронавирус акатнавайбур сагъар хъувунин карда герек къвезвай дарманарни рекье тунва.
* * *
Дагъустанда коронавирусдихъ галаз алакъалу гьалар гьеле къизгъинбур яз амукьзава. РД-дин Роспотребнадзорди хабар гузвайвал, 27-майдин делилралди, республикада вирус акатнавайбур виридалайни гзаф Махачкъалада (1553), Каспийскда (234), Къизлярда (161), Хунзах районда (123), Буйнакскда (118), Сергокъала районда (118), Дербентда (117), Ногъай районда (117), Къизляр районда (114) ва Хасавюрт районда (105) ава.
Кьиблепатан Дагъустандин районрикай рахайтIа, Сулейман-Стальский районда — 53, Ахцегь районда — 20, Кьурагь районда — 7, Мегьарамдхуьруьн районда — 5, Докъузпара районда — 2, Хив районда — 14, Табасаран районда — 22, Рутула — 20, Агъула — 41 ва Дербент районда 35 кас начагъбур ава.
Коронавирус акатнавайбурун кьадардал гьалтайла, Дагъустан уьлкведа 6-чкадал чкадал ала.
Чи мухбир
