США-дин генералди малумарна

США-дин стратегиядин кьиле авай генерал Жон Хайтена малумарайвал, Россиядиз “магълуб тежер” гиперсесинин ракетаяр авайдакай Вашингтондихъ якъин делилар авач, амма ада Москвада арадал гъизвай алай аямдин яракьдин гьакъиндай Россиядин Президент В.Путина лагьай гафарин чlалахъ хьуниз эверна. Идан гьакъиндай “DefenseNews” чешмеди хабар гузва.

“И ракетайрин мумкинвилерин гьакъиндай завай квез техникадин жигьетдай галай-галайвал ихтилатиз жедач. Амма Россияди ва Китайди гиперсесинин яракь ахтармишай гьал чна гьикl вилив хвенатlа, идакай завай лугьуз жеда”, — къейдна Хайтена.

Генералдин гафарай, эхиримжи йисара США-дини ахьтин яракь ахтармишнай, амма нетижа тамамвилелди рази ийидайди хьанач, гьавиляй и кар кьулухъ туна. Гьа са вахтунда Хайтена умуд кутазвайвал, гъалатlар туьхкlуьрна, гъиле кьур кар давамар хъийида.

Къейд ийин, 1-мартдиз В.Путина Россиядин армияда “Кинжал” тlвар алай гиперсесинин авиациядинни ракетайрин комплекс пайда хьанвайдакай лагьанай. Ада малумарайвал, и жуьредин яракьдиз тешпигьди дуьньяда мад садахъни авач.

Крым вахчуз жедай гьалда авач

Украинадин министр Георгий Тукади малумарайвал, алай вахтунда Украина Крым вахчуз жедай гьалда авач. Адан гафаралди, Киев алай вахтунда сиясатдин метлебдин месэлаяр гьялунивай къерех хьуниз мажбур я. Гьа са вахтунда министрди къейдзавайвал, Донбасс ва Крым са кьадар вахтарилай Украинадик акахь хъийида. Россияди лагьайтlа, гуя “вичин гьерекатрин патахъай жаваб гуда”.

2014-йисан мартдиз референдум кьиле тухвайдалай кьулухъ Крым Россиядик акахь хъувуна.

Кьуьзуь тахсиркардиз жаза гана

Америкадин Алабама штатда алай вахтунда 83 йисан яшда авай тахсиркардиз талукь яз кьиникьин жаза гунин къарар акъуднава. Идан гьакъиндай “Reuters” чешмеди хабар гузва.

Уолтер Мудидиз 1989-йисуз округдин судья кьинай кар ганай. Силисчийри тахсиркарди судьядиз почтадай бомба ракъурайди субутна. Амма Уолтера сифтедай вичин тахсир хиве кьазвачир.

И мукьвара Алабама штатдин палатадин чlехи пай векилар кьиникьин къарар кьилиз акъудунин карда азот ишлемишунин терефдарар хьана. Кьиникьин раб ядай мумкинвал авачирла, ихьтин къайда ишлемишдайвал я. “Икl регьят я, са тlарвални авачиз кьилиз акъудиз жеда”, — лугьузва векилрикай сада.

ООН-дин генсекди къейдна

ООН-дин генеральный секретарь Антониу Гутерриша Хатасузвилин Советдин къуватсузвал хиве кьуна. Шведрин SVT телеканалдиз интервью гудайла, ада уьлквейрин арада ачух къайи дяве арадал къвезвайдакай малумарна.

Сирияда кьиле фейи авиациядин ягъунриз талукь суалдиз жаваб гудайла, ада ихтилатай­вал, “ихьтин жуьредин гьалариз ихтиярар гун патал гъавурда акьадай къайдаяр ава, ам­ма гила кьулухъ вил вегьин хъувуна кlандач”.

ХХ асирдин девирдихъ галаз гекъигайла, бязи тафаватлувилер авайдини къейд авуналди, ада “къайи дяве элкъвена хтанва” лагьана. “А чlавуз США-динни Советрин Союздин арада еке къалмакъал авай. А чlавуз хьиз, гила Вашингтондини Москвади вири гуьзчивилик кутазвач”, — лагьана А. Гутерриша.

Ада Россиядинни Рагъакlидай патан арада авай къалмакъални кlевиди яз гьисабзава. “Баришугъвал арадал хкун патал чна вири жуьрейрин мумкинвилерикай менфят къачун герек я”, — алава хъувуна генсекди.

Гутерриша 1-январдиз вичин чарче инсаниятдик къалабулух кутазвай месэлайрикай малумарнай. Адан гафаралди, дуьньяди кьулухъди кам къачунва. Амма хатасузвал арадал хкиз жеда, эгер дуьньядин уьлквейрин кьиле авайбур сад хьайитlа.

Чемпионвилин тlвар хуьда

Какахьай женгерай Россиядин машгьур спортсмен, UFC версиядай чемпион Гьабиб Нурмегьамедова чемпионвилин чlул хуьнин планрикай ихтилатнава. 29 йисан яшда авай спортсменди къейднавайвал, адан заланвилин дережада чемпионвилин тlвар къачуз кlан­дайбур тIимил авач. Ада вичин чемпионвилин тlвар хуьн патал алай йисан ноябрдиз ва я декабрдиз женг тухун мумкин тирдакай лагьана.

“Нихъ галаз кьиле фейитlани, хъсан бягьс жеда. За садрани бягьс тухудай кас хкязавач, гьамиша теклифайбурухъ галаз экъечlзава. Исятдани хкязавач”, — къейдна Нурмегьамедова.

Ам UFC-ди авур теклиф кьабулиз гьазур я. 15-апрелдиз малум хьайивал, чемпионвилин тlвар патал Гь.Нурмегьамедовахъ галаз женгиниз Америкадин спортсмен Дастин Порье экъечlда. И хабар UFC-дин кьил Дэйна Уайта тестикьарна.

Франциядин орден вахкана

Сириядин президент Башар Асада Франциядин гьукумдаррив хашунин кlалубда авай орден элкъуьрна вахкана. Идан гьакъиндай вичин Twitter-да Сириядин президентдин канцеляриядин векилди малумарнава.

“Орден вахкунин къарар Францияди США-дихъни Великобританиядихъ галаз санал 14-апрелдиз Сириядиз акси гьужумра иштиракунихъ галаз алакъалу я”, — тестикьарзава Асадан терефди.

Чlехи хаш — им Наполеонан девирдилай инихъ Франциядин вини дережадин шабагь я. Башар Асада ам  2001-йисуз Париждиз атай вахтунда Франциядин президент Жак Ширакан гъиляй къачунай.

Рикlел хкин, 14-апрелдиз США-ди, Францияди ва Великобританияди Сирияда гуя химия­дин яракьар туькlуьрзавай ва хуьзвай чкайрал гьужумнай.

Гьазурайди — Куругъли Ферзалиев