Алатай гьафтеда Махачкъалада, “Дагъустан” РИА-дин конференц-залда, коронавирусдин азардикди начагъ хьайи духтурри меркезда, “Дурнаяр” тIвар алай илимдинни сагъламвал мягькемардай комплексда (НОК), чпин сагъламвал гуьнгуьна хтуниз (реабилитация) талукьарнавай пресс-конференция кьиле фена. Ана “Дурнаяр” НОК-дин гендиректор Мегьамед Мегьамедова, “Духтурриз — баркалла!” проектдин куратор Алибег Алиева, тади куьмекдин РКБ-дин кьилин духтур Мегьамед Иманалиева, “Дурнаяр” НОК-да реабилитация кьиле фейи медицинадин къуллугъчи Лейла Хабибулаевади, журналистри иштиракна.
Пресс-конфренция ачухдай вахтунда “Дагъустан” РИА-дин гендиректор Мегьамед Мегьамедова, гьафтейралди “яру зонада” хьуналди, чпин уьмуьр ва сагъламвал хаталувилик кутуналди, духтуррал акьалтзавай азаб, абуру чIугвазвай зегьмет екеди тирди къейдна.
“Дурнаяр” НОК-дин гендиректор М.Мегьамедова духтуррин сагъламвал гуьнгуьна хтуниз талукьарнавай проект арадал атуникай суьгьбетна. Ихьтин теклиф гайиди адан диде Айзанат тир кьван. ИкI, тамам 45 йисуз медицинадин хиле зегьмет чIугунвай дишегьлидиз, телевизордай къалурзавай, гьафтейралди хизан, багърияр такваз, “яру зонада” зегьмет чIугвазвай духтурар, медицинадин хилен вири къуллугъчияр язух атана. Ада вичин хцивай — “Дурнаяр” НОК-дин гендиректордивай — абуруз куьмек гун тIалабна.
Хци дидедин гаф кIвачерик вегьенач. М.В.Ломоносован тIварунихъ галай МГУ-дин профессор яз, уьлкведин меркезда авайла, ам духтурриз куьмек гунин серенжем — “Духтурриз — баркалла!” проект — уьмуьрдиз кечирмишдай рекьер жагъурунин къайгъуйрик хьана. Жагъурна.
Вичин нубатдай яз, А.Алиева проектдин сергьятра аваз НОК-да кьиле тухвай медениятдин программадикай гегьеншдаказ суьгьбетна, духтурар къенин йикъан игитар тирди къейдна.
— Алай вахтунда коронавирусдихъ галаз вири дережайра женг тухузвайла — алимар — вакцина, дарманар — акъудунал, сагъарунин цIийи къайдаяр арадал гъунал машгъул тирла, четин шартIара кIвалахай ва и кар давамарзавай духтуррин къайгъу чIугун садан фикирдизни атанач. Залан азардикди абур чебни начагъ хьана. Чун, итимар, сада-садан гъил кьуна, салам гуникай къурху авай вахтунда абур цIудралди, вишералди азарлуяр сагъарунин къайгъуда хьана, — фикир желбна ада.
Алибег Алиева проектдин — медицинадин хиле зегьмет чIугвазвайбуру сагъламвал мягькемарунин серенжемар кьабулунин — тереф Дагъустандин Кьил В.Васильевани хвейиди раижна.
Тади куьмекдин РКБ-дин кьилин духтур Мегьамед Иманалиева, и проектдин важиблувал къейд авунихъ галаз сад хьиз, ам гележегда давамарунин важиблувиликайни лагьана. Адан гафарай чир хьайивал, Дагъустандин здравоохраненидин министр Жамалудин Гьажиибрагьимова, и проектдикай хабар хьанмазди, республикадин медицинадин вири идарайрин регьберриз ам кьилиз акъудун патал вири жуьредин куьмекар агакьарунин тапшуругъ гана.
Винидихъ тIвар кьунвай комплексда чпин сагъламвал мягькемарнавайбурун жергедай тир Лейла Хабибулаевади ихьтин мумкинвал гунай вичин ва кIвалахдин рекьяй вишералди юлдашрин тIварунихъайни Мегьамед Хабибовичаз сагърай лагьана. Ада “яру зонада” кIвалахзавай саки вири духтурар коронавирусдикди начагъ хьайиди, и азарди азаб гайи ксар патал реабилитация, дугъриданни, важиблу тирди къейдна.
Мугьманрин суьгьбетдай мадни малум хьайивал, “Дурнаяр” НОК-да вири санлай (7 потокдик кваз) медицинадин 523 къуллугъчиди чпин сагъламвал мягькемарна. Абурун жергеда Дагъустандай, гьакIни къунши республикайрай, Россиядин са шумуд региондайни (гьа гьисабдай яз, Москвадин “Коммунаркадин”) духтурар, медсестраяр ва санитаркаяр авай.
Къейд авун лазим я хьи, ихьтин проект, яни и четин вахтунда духтуррин чпин сагъламвилин гьакъиндай къайгъударвал чIугунин серенжем, дуьньяда мад санани кьилиз акъуднавач. Гьавиляй кIватI хьанвайбуру вирида и проект уьмуьрдиз кечирмишай Мегьамед Хабибовичаз, теклиф гайи адан дидедизни сагърай лагьана, адаз, кIвачел акъвазна, капар яна.
Рагнеда Рамалданова
