Дагъустандин здравоохраненидин министерствода “Земский духтур” программада иштиракун патал документар кьабулун давам жезва. И проектдиз медуниверситетар акьалтIарнавай жегьилриз ва чпин яшар 50 йисалай алат тавунвай пешекарриз теклифзава. Чна виликдайни хабар гайивал, хуьре 5 йисуз кIвалахиз рази хьайи духтурриз са сеферда миллион манат гуда. Республикадин министерстводи алай йисуз 224 духтур кIвалахдалди таъминарун пландик кутунва. Гьелелиг 50 касди икьрарар кутIуннава.
Малум тирвал, вузар акьалтIарнавай хейлин жегьилривай кIвалах жагъуриз жезвач. Абурун арада медицинадин рекьяй чирвилер къачунвайбурни ава. Гьа са вахтунда хуьруьн чкайра кIвалахдай духтурар бес жезвач. Гила лагьайтIа, медицинадин вуз акьалтIарнавай жегьилриз хуьруьн чкада кIвалахдай мумкинвал ава. Ахьтинбуруз са миллион манатни гузва. Алай вахтунда и программади Россиядин Федерациядин гзаф регионра агалкьунралди кIвалахзава.
РикIел хкин:
2012-йисалай инихъ федеральный и программа кардик кутунин нетижада Дагъустандин хуьруьн чкайрин больницайриз жегьил кадрияр атана. Программади алай йисузни кIвалахзава. РД-дин здравоохраненидин министерстводин официальный сайтда, “Земский духтур” паюна республикадин районрин больницайра ва гъвечIи шегьеррин медицинадин идарайра ачух вакансийрикай малуматар ава.
“Земский духтур” программада иштиракун патал документар кIвалахдин йикъара нисинин сятдин 2-далай нянин сятдин 5-далди агъадихъ галай адресда кьабулзава: Махачкъала шегьер, Абубакарован куьче, 10-нумрадин дарамат, 1-мертеба, Дагъустандин здравоохраненидин министерство. Мадни гегьенш малумат телефондин 8 (8722) 67-90-56 нумрадиз зенгна къачуз жеда.
«Лезги газет»
