—            Мекьи хьана, уьгьуьяр акатнавайла, къуьлуьн ва мухан чIахарикай икьи хапIа ругуна, ам агъдин дасмалдал вегьена, кун тийидайвал мад са дасмалдик кухтуна, 2-3 сятдин вахтунда хурудал эцигда.

—            Кьилин мефтIедин давление авайла, йикъа пуд сеферда хуьрекдин са тIуруна авай чIухлумпIрин чайдик чайдин са тIуруна авай вирт хуькуьрна, хъвада.

—            Сивяй пис ял татун патал. Хуьрекдин 2 тIуруна авай некьийрин пешерал 2 стаканда авай ргазвай яд илична, 15 декьикьада  къалпагъ алай катулда тада. Ахпа ам куьзна фу тIуьрдалай кьулухъ сиве экъуьрда.

—            Миокарддин инфаркт  хьанвай инсанри йикъа 2 сеферда  цIийиз гьазурнавай газаррин миже ишлемишун лазим я.

—            Беденда кальций бес тежезвайла, кIарабар — кеврек, дуркIунра къванер пайда ва давление хкаж жеда. Гьавиляй некIедин продуктар ва балугъ мукьвал-мукьвал ишлемишун лазим я.

—            Руфун тIаз, къен фидайла, юкьван кьадардин кьил чичIек михьна, куьлуь авуна, адал 70 процентдин спирт ва я эрекь илична, пуд юкъуз йикъа пуд сеферда 20-25 стIал ишлемишда. Ада ратарин кIвалах хъсанарда.

—            Кьилин мефтIедин дамарар агаж хьанвайла, хуьрекдин са тIуруна авай пурнийрални цIантаррал (чабрец) 0,5 л ргазвай яд илична, 40 декьикьада тада. Ахпа ам куьзна, са гьафтедин вахтунда йикъа пуд сеферда хуьрекдин пуд тIуруна авайди ишлемишда.

—            КIвачер, гъилер тIазвайла (полиартрит), ихьтин къаришмади куьмек гуда: 3 кьил серг ва пуд лимон (цилер хкудна) як регъведай машиндай авадарда ва аниз 0,5 кг вирт алава хъувуна, вири сад-садак какадарна, йикъа 2 сеферда хуьрекдин са тIуруна авайди ичIи рикIелай ишлемишда.

Гьазурайди — Надият Велиева