И йикъара «Докъузпара район» МР-дин кьил Абдурагьим Алискерова райондин идарайринни тешкилатрин жавабдар къуллугъчийрихъ, хуьрерин администрациядин кьилерихъ галаз нубатдин совещание кьиле тухвана.
Совещанидал жуьреба-жуьре месэлаяр веревирдна, вилик акъвазнавай месэлаяр малумарна, абур гьялдай рекьер жагъурна.
Райондин экономикадин отделдин начальник Султанмурад Магьмудова 2018-йисан пуд лагьай кварталдиз талукь яз кlватlнавай налогрин гьакъиндай ихтилатна. Вичин рахунра ада чилер актуализация авунин жигьетдайни районда авай гьалар малумарна. Налогрин вири жуьрейриз талукь яз ада хуьрера ва санлай районда гьихьтин гьалар аватlа, галай-галайвал ихтилатна. Къейд авурвал, объектар ва чилерин участокар регистрация авунин кар хъсандаказ кьиле физва. Гьа са вахтунда райондин сергьятра регистрация авачиз кlвалахзавайбур дуьздал акъудунин кlвалахни активдаказ давамарзава. Регистрация авачиз кlвалахзавай ксар учетда эцигзава ва абурухъ галаз икьрар кут1унзава. Гуьгъуьнлай ада чилериз талукь са бязи месэлаяр къайдадик кутун патал хуьрерин администрациядин кьилеризни тапшуругъар гана.
Гуьгъуьнлай райондин мектебриз талукь месэладикай ихтилатар давам хьана. Икl, райондин кьил Абдурагьим Алискерова малумарайвал, райондин кьилин заместитель Салигь Гьажимурадова ва технический отделдин начальник Фазил Сурхаева вири мектебар ахтармишнава ва къайдадик кутун хъувуна герек тир крариз талукь тир смета туькlуьрнава. Малум хьайивал, хъуьтlуьн сезондиз вири мектебар лазим тирвал гьазур жеда.
Коррупциядиз аксивалунин рекьяй райондин кьилин куьмекчи Саддам Агъаширинова къейд авурвал, муниципальный къуллугъдал алай ксариз тешкилатривай ва я кьилдин ксаривай савкьатар къачудай ихтиярар авач, савкьатдин къиметдилайни ам гунин себебдилай аслу тушиз. Ада гьакlни райондин сергьятра 2018-2020-йисара коррупциядиз аксивалунин жигьетдай тухудай кlвалахдин план туькlуьрнавайдакай малумарна.
Совещанидин эхирдай райондин кьил Абдурагьим Алискерова къейд авурвал, 5-октябрдиз муаллимр югъ – сувар къейдзава. Миграгърин мектеб эцигайдалай инихъ алай йисуз 100 тамам хьанва. Райондин кьили и вакъиайриз талукь тир шад мярекатра вирида иштиракун лазим тирди лагьана.
«Лезги газет»
