22-23-сентябрдиз Дагъустандин Огни шегьердин М.С.Умаханован тlварунихъ галай спортзалда 2003-2004-йисара дидедиз хьайи жегьилрин арада Дагъустандин кlвенкlвечивал патал боксдай кьиле фидай акъажунриз викlегь спортсменар хкягъунин Дакъустандин кьиблепатан зонадин турнир кьиле фена. И гьакъиндай «Лезги газетдиз» Сулейман-Стальский райондин администрациядин пресс-къуллугъди хабар гузва.

Акъажунра Махачкъала, Избербаш, Дербент, Дагъустандин Огни шегьеррай, Сулейман-Стальский, Мегьарамдхуьруьн, Ахцегь, Дахадаевский, Дербентский ва Къайтагъ районрай  200-далайни гзаф спортсменри иштиракна.

Турнирдин макьсад бокс машгьур авун ва Дагъустандин кlвенкlвечивал патал къуватлу боксерар винел акъудун я. И сеферда Сулейман-Стальский райондай 9 боксерди иштиракна. Акъажунриз абур Герейханован хуьруьн 2-нумрадин ДЮСШ-дин тренер Роберт Нагъиева гьазурна. Адан командадай сифте бягьсер тухвайдалай кьулухъ 7 боксер финалдин бягьсерив кьван агакьна. Нетижада жуьреба-жуьре заланвилерай Султан Султанов, Бахтияр Гьажимегьамедов ва Амир Таибов гъалиб хьана. Гъалибчиярни призар къачурбур грамотайралди ва медалралди къейдна.

«Лезги газет»