И йикъара хпежви Рамазанан гада Расим махсус военный серенжемдай отпускдиз кIвализ хтанвай. Ада Советрин Союздин Игит Абас Исрафилован тIварцIихъ галай Белиждин гимназияда зи хцихъ галаз санал 11-класс акьалтIарна. Уьмуьрдин рекьер гьарнихъ акъатнатIани, абуру чпин арада авай дуствилин алакъаяр мягькемдиз хуьзва. И гъилерани хва хуьруьнви аскердихъ илифна. Зазни адахъ галаз суьгьбет ийидай мумкинвал хьана.
Рамазанов Расим 1988-йисуз Белиж поселокда дидедиз хьана. Адан дах Рамазан хуьре гьуьрмет авай электрик, дидени 4-нумрадин СОШ-да техработник тир, гила пенсияда ава. Хуьре гьуьрмет авай хизан я. Мектеб акьалтIарай 2007-йисан майдиз Расимаз армиядин жергейриз эверна. Ада Москвадин къенепатан кьушунра са рехнени квачиз къуллугъна. 2009-йисуз младший сержант Р. Рамазанов Нижний Новгороддиз фена ва РФ-дин Оборонадин министерстводихъ галаз икьрар кутIунна. Ам танкарин бригададин взводдин командирдин заместителвиле тайинарна. Са йисалай диде-бубадин меслятдалди кIвализ хтана. Мехъер авуна, гурлу межлис къурмишна. Ахпа Минеральные воды шегьердиз фена, къенепатан кьушунрин частунин спецназда къуллугъдай икьрар кутIунна. 2020-йисуз РФ-дин милли гвардиядин Федеральный къуллугъдин кьушунрин приказдалди младший сержант Рамазанов Расим «Чешнелудаказ къуллугъ авунай» кьвед лагьай дережадин медалдиз лайихлу хьана.
2022-йисан 24- февралдиз абурун часть Белгороддиз рекье туна, анай, са шумуд патал пайна, дяведин гьерекатар физвай чкайриз ракъурна. Расим вичин отделенидихъ галаз Харьков галай патахъ акъатна. Абурун везифа техника ва аскерар герек чкадал агакьарун я.
Дяведин махсус серенжемдив гатIунайдалай инихъ ада Харьковдин, Луганскдин ва Донецкдин чилерал кьиле фейи женгера иштиракна. Адан гафарай малум хьайивал, абуру пуд вацра махсус серенжемда ва пуд вацра чпин частуна къуллугъзава.
«Харьков галай пата нубатдин сеферда миллетчийрихъ галаз женг тухвана, чи взвод алай чкадилай инихъ хтанвай, — ихтилатзава ада. Чи разведчикри гайи хабардалди, миллетчияр чибурун геле гьатнавай. Командирди гайи буйругъдалди зун абур хкун патал машинда аваз рекье гьатна. Чи гьерекатрикай хабар хьайи миллетчийри чаз гуьлле ганатIани, Аллагьдиз шукур, зун чи аскерар вири сагъ-саламатдиз хатасуз патахъ хкиз агакьна».
«Луганскдин терефда кьве патайни ягъунар физвай са нянихъ командирди зи дестедин вилик женгера иштиракзавай чи аскеррихъ галаз яргъал мензилда алакъа хуьдай ретрансляторар эцигун эмирна, — давамарна ада. — Везифа кьилиз акъудун акьван регьят кIвалах тушир. Абур эцигна кIанзавай хуьрерин кIвалерин бязи подвалра миллетчияр амазмай. Гьи патахъай хьайитIани, чаз гуьлле гунин къурхулувал авай. КIвалах фад-фад кьилиз акъудна кIанзавай. Душман уях жедалди, чна вилик эцигнавай везифа магьрумвилер авачиз тамамарна».
Алай вахтунда младший сержант, отделенидин командир Расим Рамазанова махсус везифайрин центрада (центр специального назначения) къуллугъзава.
Женгинин юлдашри кьиле физвай вакъиайрикай вуч фикирзава лагьана гайи суалдиз ада икI жаваб гана: «Аскеррин рикIе, миллетчияр тади гьалда кукIварна, фад гъалибвал къазанмищдай къаст ава. ГьакI женни ийида. Миллетчийрал цIай къурна, са рахунни алачиз, гъалибвал къазанмишда».
Р. Рамазанов РФ-дин милли гвардиядин Федеральный къуллугъдин кьушунрин приказралди «Махсус военный серенжемдин иштиракчи» лагьай, «Чешнелудаказ къуллугъ авунай» кьвед ва пуд лагьай дережайрин, «Женгинин гьунарлувиляй» кьвед лагьай дережадин медалрин ва частунин шабагьдин сагьиб я. Хизанда кьве аялдиз тербия гузва.
Къагьриман Ибрагьимов
