Мегьарамдхуьруьн райондин администрациядин кьил Фарид Агьмедов вахтуналди ял ягъиз хтанвай дяведин махсус серенжемдин иштиракчи Абдуллагь Эмировахъ галаз гуьруьшмиш хьана.
ЦIийи Филерин хуьряй тир Эмирова гьеле 2018-йисуз РФ-дин оборонадин министерстводихъ галаз Россиядин Армияда къуллугъ авунин гьакъиндай икьрар кутIунна. Дяведин махсус серенжемдив эгечIай йикъалай ада Украинадин миллетбазрихъ галаз женг чIугвазва, Ватандин итижар хуьзва. Нубатдин тапшуругъ тамамардайла аскердал залан хер хьана. Госпиталда ва реабилитациядин центрада сагъламвал мягькемар хъувунвай аскерди гьеле ял язава. Ам вичин юлдашрин патав хъфиз гьазур жезва. Женгера къалурай викIегьвиляй адаз «Жуьрэтлувиляй» медаль ганва.
Фарид Агьмедова, Ватандиз намуслувилелди къуллугъзавай Абдуллагь Эмирован уьтквемвал, къастунал кIевивал къейд авуналди, адаз гьуьрметдин грамота гана.
— Дяведин махсус серенжемда иштиракзавай Абдуллагь Эмиров хьтин кьегьалар чи районда мадни ава. Абур вири игитар я. Абуру къуллугъдин гьар юкъуз, гьар са женгинал Ватан кIан хьун, адаз вафалувал авун къалурзава, — лагьана Ф. Агьмедова.
* * *
Дяведин махсус серенжемда иштиракзавайбурун патай чкадин муниципалитетрив, депутатрив, гьукумдин идара ийидай органрив ва гьакI жемиятдин тешкилатрив жуьреба-жуьре тIалабунар агакьзава. Талукь ксар абур кьилиз акъудун патал алахъзава.
Махсус серенжемдин иштиракчи, инженервилинни саперрин 539-бригададин жергедин аскер Мегьамед Бийкалагуммаева Дербент шегьердин администрациядивайни чпиз куьмек гун тIалабнавай. И йикъара ам шегьердин администрациядин кьил Агьмед Къулиева кьабулна. Абурун арада суьгьбет кьиле фена.
Агьмед Къулиева аскердив квадрокоптерар, дизелдин генераторар, йифиз лишанар къалурдай алатар ва маса шейэр вугана.
— И алатар, шейэр чи аскерриз лап герекзава, — лагьана М. Бийкалагуммаева. — Абурун куьмекдалди чна командованиди вилик эцигзавай везифаяр тирвал тамамарда. За чи бригададин вири аскеррин ва офицеррин патай квез сагърай лугьузва.
СВО-дай хабар атайвал, Дербент шегьердай рекье тунвай техника карда ишлемишзава.
«Лезги газет»
