Украинадин миллетбазрикай Донецкдин, Луганскдин, Запорожьедин, Херсондин мулкар азад авун патал кьиле тухузвай серенжем эхирдиз къвезвай хьтинди я. Зеленскийди ва адан гъилибанри дяве ийидай я яракьар, я бес кьадарда аскерар, я пулдин такьатарни амачирдакай чпин «халуйриз» шикаятзава, абурувай куьмек тIалабзава. Украинадин «военный машин» кьарада акIанвайди аннамишнавай «халуйри» анжах кьуру гафаралди куьмек гузва. Ихьтин гьаларикай менфят къачуна, Россиядин кьушунри миллетбазрин гъиляй са-са хуьр, шегьер ахкъудзава. Махсус серенжемда чи ватанэгьлийрини чпин буржи намуслувилелди тамамарзава ва женгера дамахдай, гьейранвалдай игитвилер къалурзава. Гьукуматди ва шегьеррин, районрин муниципалитетри кьегьал рухвайрин ва абурун хизанрин гьакъиндай датIана къайгъударвалзава. Идан гьакъиндайни агъадихъ чна гузвай материалри шагьидвалзава.

СтIал Сулейманан район

Гъилевай йисуз райондай  11 касди чеб махсус серенжемдиз ракъурунин гьакъиндай уьлкведин оборонадин министерстводихъ галаз икьрар кутIунна. Абурун арада Кьасумхуьрелай тир 50 йисан яшда авай старший сержант Рамиз Меликовни ава. Жегьил вахтунда ада Тажикистанда сергьят­дихъ галаз алакъалу частара къуллугънай. Дяведин гьерекатрин ветеранди Ватандиз вичин куьмекни герекзавайди гьиссна. Уьлкведин итижар хуьн ада вичин хсуси буржи яз гьисабзава.

Махсус серенжемдиз рекье твадалди Рамиз Меликов СтIал Сулейманан райондин кьилин жемиятдин хатасузвал хуьнин рекьяй заместитель Абуталиб Фатулаева кьабулна. Адахъ галаз яшайишдин, хизандин месэлайрикай суьгьбетна.

Уьлкведин кьегьал, дирибаш рухвайри четин шартIара миллетбазрихъ галаз женг чIугвазвай, мулкар азад хъийизвай вахтунда кIвале ацукьна гуьзетун лайихлувал туширди къейдна Р. Меликова.

Ихьтин ватанпересвал къалурзавай, Ватандин итижар хуьз гьазур касдиз Фатулаева сагърай лагьана, ам СВО-да къуллугъзавай ксариз ва абурун хизанриз яшайишдин рекьяй гузвай куьмекдин гъавурда туна. Ада Рамиз Меликовав мергьяматлувилин «Умуд» фондунин патай 100 агъзур манат пул вахкана ва кьегьалдихъ мягькем сагъламвал хьун, махсус серенжемда хъсандиз къуллугъун, сагъ-саламатдиз хайи макандиз хтун алхишна.

Рамиз Меликова СВО-да авай дирибаш рухвайрин ва абурун хизанрин патахъай къайгъударвал чIугвазвай райондин администрациядиз, «Умуд» фондуниз сагърай лагьана.

***

Курхуьруьн библиотекада махсус серенжемдин иштиракчи Мирзекеримов Ша­банахъ галаз агьалияр гуьруьшмиш хьана.

Икьрардин бинедаллаз къуллугъзавай аскерди Херсон областда Россиядин кьушунрихъ галаз вичин вилик эцигзавай везифаяр тамамарзава. ШартIар четинбур, женгер къизгъинбур ятIани, командиррин тапшуругъар ян тагана кьилиз акъудзава.

Хуьруьн культурадин кIвалин директор Тарлан Саругъланова кIватI хьанвайбуруз Ш.Мирзекеримован тарифлу къуллугъдикай суьгьбетна, адан тIварцIихъ чими келимар лагьана.

Библиотекадин заведующий Элина Саругълановади Украинада кьиле тухузвай махсус серенжемда иштиракзавай виридахъ сагъ чанар, женгера игитвилер ва гъалибвал гваз дидейрин патав хтун алхишна.

***

Зизикрин хуьруьн библиотекадин заведующий Гуьльше Мегьамедовади дяведин  махсус серенжемда иштиракзавай  Мегьамедкеримоврин хизандал кьил чIугуна. Абурун диде-бубади ихтилат авурвал, кьве хцини — Артурани Заура — махсус серенжемдив эгечIай гьа сифте йикъарилай миллетбазрихъ галаз женг чIугвазва. Абур Чечняда арадал атай дяведин гьерекатрин иштиракчиярни хьайиди я. Красноярскдин махсус везифайрин частара къуллугъзавай уьт­квем рухвайри гилани чпин везифаяр жуьр­этлувилелди тамамарзава.

Г. Мегьамедовади хизандиз сабурлувал хуьн, кьегьал рухваяр саламатдиз кIвализ хтун алхишна.

Хийир  Эмиров