Махачкъала шегьерда, “Город мастеров” аллеяда, халкьдин сеняткарвилин фестиваль кьиле фена. Республикадин туризмдин ва халкьдин сеняткарвилерин рекьерай министерстводи тешкилай и мярекатда Дагъустандин районрай атанвай 100-далай виниз устIарри иштиракна.
Ана районри кьилди-кьилди чпин майданар тешкилнавай. Халкьдин сеняткарвилин устIарри чпин алакьунар къалурунихъ галаз санал, майданрал районрин художественный самодеятельностдин коллективри, ансамблри манияр лагьана, гъвечIи сегьнеяр къалурна.
Сулейман-Стальский районда халкьдин сеняткарвилер кIвачел ахкьалдар хъувунин центрадин майдандал райондин край чирдайбурун музейдин директор, хъенчIин къапар гьазурдай устIар Набиюллагь Керимханова вичин алакьунар, устадвал къалурна. Ада гьазурнавай Испикрин хъенчIин къапариз ва къапар гьазурунин рекьяй къалурай мастер-классдиз фестивалдин жюриди ва тамашачийри еке къимет гана. Фестивалда, Н.Керимханован устадвилиз килигна, РД-дин туризмдин ва халкьдин сеняткарвилин рекьерай министерстводи Сулейман-Стальский райондиз чухсагъул малумарна, халкьдин сеняткарвал хуьник, декоративно-прикладной искусство вилик тухуник еке пай кутунай Набиюллагьаз Дагъустан Республикадин культурадин министерстводин диплом гана.
Республикадин фестивалда къазанмишай агалкьунрай райондин кьил Нариман Абдулмуталибова хъенчIин къапарин устIар Набиюллагь Керимхановаз чухсагъул лагьана.
Хазран Кьасумов
