Къецепатан уьлквейриз фин патал РФ-дин ватандашриз герек жедай паспорт республикада кардик квай МФЦ-дин бязи идарайрай туькIуьриз жезвайди вирибуруз малум ятIани, и жигьетдай агьалийриз суаларни амукьзава.
Загранпаспорт къачуз кIанзавай кас РФ-дин паспорт гваз МФЦ-диз фин лазим жеда. Эгер ватандашдихъ идалай вилик туькIуьрнавай загранпаспорт аватIа, гьамни гваз хьана кIанда. И къуллугъ кьилиз акъудун патал виликамаз нубат кьунин чарасузвал авач.
Загранпаспорт туькIуьруниз талукь вири крар (сканирование, госпошлина гун, гьазур хьанвай паспорт вахчун) МФЦ-дин идарада кьиле фида. Рекъемрин (цифровой) шикил ягъайдалай кьулухъ 30 югъ алатайла, паспорт гьазур жеда.
Исятда цIийи жуьредин загранпаспортар арадал атанва. Абурук адан сагьибдикай информация (фамилия, тIвар, бубадин тIвар, паспортдин серия ва нумра) авай чип ква. Идалайни гъейри, куьгьне жуьредин загранпаспорт ишлемишиз жедай муддат 5 йис тиртIа, цIийи жуьрединди 10 йисуз ишлемишиз жезва.
Ватандашдивай вичихъ авай загранпаспортдин вахт куьтягь тахьанмазни цIийиди къачуз жеда. И дуьшуьшда ишлемишунин вахт акьалтI тавунвай кьве паспортдихъни сад хьтин къуват ава.
«Лезги газет»
