Играми ватанэгьлияр! Гьар йисан рамазандин вацра газет кIелзавайбурун арада тухузвай диндин конкурс гатIуннавайдакай хабар гузва. Къейд ийин хьи, цIи и серенжем медениятдинни марифатдин Алкьвадар Гьасанан тIварунихъ галай центрадини «Лезги газетдин» редакцияди саналди тешкилнава.
Лагьана кIанда, конкурсдин асул макьсадрик газет кIелзавайбурухъ диндин рекьяй авай чирвилер артухарун, инсаният патал Исламдихъ авай метлеб, кьетIенвал къалурун, кIелзавайбурун арадай диндин дерин чирвилер авайбурун алакьунар къейд авун акатзава.
Конкурсдин кьилин шартIарикай сад ам я хьи, виликдай хьиз, цIини ана Исламдин университетар, медресаяр акьалтIарнавайбуруз, кьилдин алимривай, имамривай чирвилер къачунвайбуруз иштиракдай ихтиярар авач. Вучиз лагьайтIа, абур хъсандиз диндин гъавурда ава ва конкурсдин суалриз абурувай са четинвални авачиз жавабар гуз жеда. И конкурс, асул гьисабдай, жемят, адетдин газет кIелзавайбур (чпихъ Исламдай имамрихъ, муаллимрихъ, алимрихъ хьтин чирвилер авачирбур) патал я. Яшарин жигьетдай тайин сергьятар авач, конкурсда жегьилривайни иштиракиз жеда, яшлубурувайни.
Конкурсдин суалриз жавабар гун патал 2 гьафте вахт тайинарзава, 28-апрелдалди. Анлай кьулухъ жавабар кьабул хъийидач. Иштиракчийривай чпин жавабар редакциядиз пуд жуьредикай менфят къачуна ракъуриз жеда:
1) почтадин алакъадин отделенийрай (РД, Махачкала, пр-т Насрутдинова, 1 “А”, 7-этаж);
2) интернетдин куьмекдалди «Лезги газетдин» электронный почтадиз (адрес — Lezgigazet@yandex.ru);
3) ватцапдиз (телефондин нумра — 8989-653-42-35) рекье тваз жеда.
Гьим къулай ятIа, гьам хкягъа. Жабавар аваз рекье твазвай чарчин сифте кьиляй “Конкурсдиз” гаф кхьиз рикIелай алудмир.
Гъалибчияр пуд кас хкяда. КIвенкIвечи чкаяр кьурбуруз савкьатар гуда: 1-чка — телефон, 3 агъзур манат; 2-чка — рикIел аламукьдай (памятный) савкьат, 2 агъзур манат; 3-чка -капI ийидай халича, 1 агъзур манат пул. Идалай гъейри, абуруз лезги чIалал Ислам диндикай кхьенвай ктабар ва дипломар гуда.
Эгер цIи конкурсда иштиракдайбурун кьадар вилик квай йисарилай гзаф хьайитIа, абурун арада конкурсдин кьилин савкьат — умрадиз фидай путёвка къугъвада. Адаз виридалайни гзаф баллар къазанмишай кас лайихлу жеда.
Иштиракчияр патал мад са шартI ава: редакциядиз жавабар рекье твадайла, тIварни фамилия, яшамиш жезвай чка (шегьер, район, хуьр) ва телефондин нумра къалурун чарасуз я.
Конкурсдин нетижаяр Рамазандин варз куьтягь хьайидалай кьулухъ кьада ва гъалибчийрин тIварар газетдай малумарда. КIвенкIвечи чкаяр кьурбурувай савкьатар мус ва гьинай вахчуз жедатIа, тешкилатчийри абуруз зенг авуна хабар гуда. Конкурсдин кIвалахриз баллрин куьмекдалди къимет гуда.
ЦIинин йисан конкурс 25 суалдикай ибарат я. Къейд ийин хьи, абур 2021-йисан 26-нумрадилай инихъ (2022-йисан 15-нумрадал къведалди) “Лезги газетдин” чинриз акъатнавай диндин макъалайрин бинедаллаз гьазурнава.
Суалар:
1).
А). Фикъгьи илим вуч я, ам квекай рахазва? (1 балл)
Б). Фикъгьидин мазгьабар вуч я? (1)
В). Мужтагьид кас вуж я? (1)
Г). Гьар са фикъгьи-ктабда гзаф разделар (хилер) ава: кьуд разделдин тIварар кхьихь. (2)
2). Гьижрадин кьвед лагьай асирдилай кьуд лагьай асирдин юкьвал кьван мусурманриз цIипуд мужтагьид хьана, абурукай ругудан тIварар кхьихь. (2)
3). Ислам дин Аллагь Таалади инсанар патал менфятлу вад кар аваз ракъурнава (яни шариатдин къанунри гьар са инсандиз вад шей хуьзва). Гьибур я абур? (2)
4). Къенин йикъалди «Агьлу-Суннадин» машгьур тир кьуд мазгьаб амукьнава:
А). Имам Абу-Гьанифадикай кхьихь: адан тIвар, бубадин тIвар, хайи чка, ам хайи ва кьейи йисар. Адан кьве тилмиздин (сухтадин) тIварар. Адан кьве ктабдин тIварар. Гьанафи-мазгьаб авай уьлквеяр. (2)
Б). Имам Маликакай кхьихь: адан тIвар, бубадин тIвар, хайи чка, ам хайи ва кьейи йисар. Адан кьве муаллимдин ва кьве тилмиздин тIварар. Адан кьве ктабдин тIварар. Малики-мазгьаб авай уьлквеяр. (2)
В). Имам Шафиидикай кхьихь: адан тIвар, бубадин тIвар, хайи чка, ам хайи ва кьейи йисар. Адан кьве муаллимдин ва кьве тилмиздин тIварар. Адан кьве ктабдин тIварар. Шафии-мазгьаб авай уьлквеяр. (2)
Г). Имам Агьмад ибн Гьанбалдикай кхьихь: адан тIвар, бубадин тIвар, хайи чка, ам хайи ва кьейи йисар. Адан кьве муаллимдин ва кьве тилмиздин тIварар. Адан кьве ктабдин тIварар. Гьанбали-мазгьаб авай уьлквеяр. (2)
5). ЧIехи гунагьдин тариф (определение) гьихьтинди я? (1)
6). Абу-Гьурайра асгьабди (Аллагь рази хьурай вичелай) хабар гузвайвал, Пайгъамбардин (къуй Аллагьдин патай салават ва саламар хьурай вичиз) гьадисда лагьанва, (мана):
«Куьн яргъаз хьухь ирид телефдайбурукай! Абуру лагьана: «Я расулаЛлагь, гьибур я абур?». Ада лагьана:… Гьадис эхирдалди кхьихь. (2)
7). ЧIехи ширкдин определение вуч я? Ам Аллагьдин гьакъиндай гьи пуд карда жезватIа куьрелди баян це. (2)
8). ГъвечIи ширкдин кьве мисал гъваш ва абуруз делиларни кхьихь. (2)
9). ГъвечIи ширкдикай хуьн патал гьадисда гьи дуьа къулурнава? (1)
10). Шариатдин «рукъйа» вуч я, адан шартIар гьибур я? (2)
11). Ширкдикай мукъаятвал авунин эмирар гзаф ава, аятдай ва гьадисдай са делил кхьихь. (2)
12). Инсанрин арада сифте яз ширк мус арадал атана? (1)
13). Мавгьумат (суеверие) ширкдин крарикай я: адакай вуч зарар ава? Ам къадагъа ийизвай са делил кхьихь. (1)
14). Гьадисда къалурнава: чи уьмметдикай 70 агъзур кас гьахъ-гьисаб галачиз Женнетдиз фида. Вужар я абур? (1)
15). Алимри лугьузва: суьгьуьр авун — куфрдин кар я. А кар тестикьарзавай са делил кхьихь. (1)
16). Фалчи вуж я ва адан патав фена хабар кьур касдин гьакъиндай гьадисда вуч лагьанва? (1)
17). Инсан яна кьин чIехи гунагь ва ам къадагъа тирди къалурзавай са делил кхьихь. (1)
18). «Риба» къадагъа тирди къалурзавай са делил кхьихь. (1)
19). «Риба» ругуд шейинин гьакъиндай гьарам тирди къалурнававай гьадис кхьихь. (2)
20). Етимдин мал гьахъсуздаказ тIуьн къадагъа тирди субутзавай са делил кхьихь. (1)
21). Диндар, михьи муъмин-дишегьлийрал (зина авунин) буьгьтен (чIуру кар авунин тахсир) вегьин къадагъа тирди субутзавай делил гьим я? (1)
22). ЧIехи гунагьар 70-далай гзаф ава. Гьадисда къалурнавай иридалай гъейри, мад вад чIехи гунагьдикай кхьихь. (2)
23). Муртадвилин жуьреяр пуд ава, абур гьибур я? (1)
24). Ислам чIурзавай (диндай акъудзавай) крарикай вад кар кхьихь. (2)
25). Рамазан вацра сив хуьн ферз тирди къалурзавай са делил кхьихь ва гьижрадин гьи йисуз ам (сив хуьн) важиблу авунва? (2)
«Лезги газет»
