2019-йисан эхирра дуьньяда пайда хьайи коронавирусдин тIугъвалди, малум тирвал, ви­чин чIулав чин къалурна. Хейлин уьлквейриз, шегьерриз, хуьрериз гьич рикIелни алачир­ зидвилер гъана. Къурбандрин кьадар ми­л­лионрив агакьна. Шукур Аллагьдиз, гила вирусдин гьерекатар къвез-къвез зайиф ­жезва.

И дуьньяда инсан халкь хьайи чIавалай инихъ жуьреба-жуьре тIегъуьнар хьайиди я. Мисал яз, дяве, ички, наркомания гзаф кьадар инсанар телеф хьунал гъизвай тIегъуь­нар я. Дяведин “гьунарар” чаз гьар юкъуз телевизордай аквазва. Ичкидин аламатар акун патални са акьван яргъал фин герек жезвач. Нянин кьиляй кимел экъечIун бес я: анал пиянбурни тахьана жедач. Бязибуру лагьай­тIа, ким духандиз элкъуьрда, гьанал ацукьна хъвада.

Эхиримжи йисара чи хуьрера тазиятдин мярекатрик урусрин “поминкаяр” кутунва. Урусри “поминкаяр” пуд йикъалай ийизватIа, чи­бу­ру гъиле-гъилди кьиле тухузва. И тIе­гъуьнрин­ эхир мус жедатIа яраб? Ибур дагъ­вий­рин уьмуьрдив, къанажагъдив эсиллагь кьазвай крар туш. Чна несилриз вуч тазва? Ви­нидихъ къейднавай “азарар” акатзавай гьар сада вичин вилик и суал эцигун лазим я.

Тегъи Мегьамедов