СтIал Сулейманан райондин чешнелу муаллимрин жергеда 40 йисуз сифтегьан классра тарсар гузвай муаллим Цмиханова Успагьи Мирзехановна ава. Уьмуьрдин чIехи пай ада, гьакъисагъвилелди зегьмет чIугваз, аялриз бахшнава.
Успагьи 1962- йисуз Кьасумхуьрел, ашпаз Мирзеханан хизанда дидедиз хьана. Юкьван школа хъсан къиметралди акьалтIарай ам 1978-йисуз Дербентдин педагогвилин училищедиз гьахьна, ам 1982-йисуз чешнелудаказ акьалтIарна. Сифте ада Кьасумхуьруьн ясли-бахчада тербиячивал ийиз гатIунна. Ина Успагьи Мирзехановнади кьве йисуз кIвалахна. 1985-йисалай инихъ ам ЦIийихуьруьн юкьван школада сифтегьан классрин муаллим я.
Успагьи Мирзехановнади методикадин такьатар устадвилелди ишлемишзава. Тарс гатIундалди адан кабинетда лазим тир картинаяр, таблицаяр ва схемаяр гьазурна жеда. Адан гъилик гьамиша гьар жуьредин памяткаяр, пособияр ква. Тамамдиз тарсариз гьазур хьуни, абур вини дережада аваз тухуни хъсан нетижаярни арадал гъизва.
Муаллимди, классдин руководитель яз, тербиядин кIвалахни тухузва, диде-бубайрихъ галаз сих алакъа хуьзва.
Тарсар ФГОС-дин истемишунрал амал авуна тухунилай гъейри, ада урус ва лезги чIаларин сирер ачухзава, аялар бажарагълу шаиррин, писателрин яратмишунрихъ галаз танишарзава, ачух тарсар, шаирриз, писателриз талукьарнавай межлисар тухузва. Интерактивный доскадикай, интернетдикай менфят къачуз чирзава. Адан са шумуд ачух тарс, чешне яз, Кьасумхуьруьн телевиденидай къалурна.
Урус ва хайи чIалан тарсарай аялрин фагьум-фикир вилик тухун патал муаллимди сифте нубатда тарсунин тема аялриз итиж жедайвал гъавурда тваз алахъзава, хуралай кIелзавай эсерар вичин чешнедалди, эсер ийидайвал кIелиз чирзава.
Успагьи Мирзехановнади тарсара гузвай тапшуругъар виликамаз аялрин алакьунриз килигна, пуд чкадал пайна, гьазурзава: хъсандиз кIелзавайбур, юкьван жуьреда кIелзавайбур, кIелунин рекьяй гуьгъуьна амукьзавайбур патал. И къайда ишлемишайла, пуд дестедин аялрини чпиз гайи тапшуругъар вахтунда тамамарзава ва вири кIвалахдикни жезва.
Аялри гьар йисуз школадин олимпиадайра, райондин конкурсра, илимдинни ахтармишунрин проектра иштиракзава ва аквадай хьтин агалкьунарни къазанмишзава. ИкI, Абдулмуталибов Сулеймана райондин юбилей къейд авунин лишандик кваз тухвай “Илимдинни ахтармишунрин проектдин” конкурсда “Тарих ва гьакъикъат” номинациядай ва “Малум тушир эсерар кхьинин рехъ” конкурсда сад лагьай чкаяр, Девлетханова Аминади “Интересные люди” номинациядай кьвед лагьай, Бутаева Камилади “Зимняя сказка своими руками” конкурсда кьвед лагьай чкаяр кьуна.
Математикадай адан аялри, школадин олимпиадайрилай гъейри, международный конкурсра-къугъунрани иштиракзава. ИкI, школада математикадин тарсунай къугъун-конкурс тешкилна тухунай, Успагьи Цмиханова Омскдин педагогвилин университетдин алава образованидин «Смейл» центрадин грамотадиз лайихлу хьана.
Лезги чIалай кьиле фейи олимпиадайра Серкерова София, Идрисов Муслим, Бутаева Камила, Омарова Марина — 1, 2, 3 лагьай чкайриз лайихлу хьана.
Школадин директордин чирвилерни тербия гунин рекьяй заместитель Саидгьасанова Маргина Идаятовнади адан кIвалахдиз ихьтин къимет гана: “Успагьи Мирзехановна тежрибалу, аялрал рикI алай чешнелу муаллим я. Ада тарсара ишлемишзавай къайдайри аялрин чирвилер хкажуниз вижеваз таъсирзава. Тарсар итижлудаказ, хуш гьалара кьиле физва…”
Успагьи Мирзехановна кьилин дережадин муаллим, Россиядин Федерациядин умуми образованидин гьуьрметлу работник, зегьметдин ветеран я. Просвещенидин кардик пай кутунай ам Россиядин аялрин писателрин Союздин “Мудрая Сова” медалдиз лайихлу хьанва. Школадин сифтегьан классрин методобъединенидин руководитель яз, ада райондин методобъединенидин кIвалахда активнидаказ иштиракзава, докладар ийизва.
Яргъал йисарин гьакъисагъ зегьметдай Успагьи Мирзехановна СтIал Сулейманан райондин кьилин гьуьрметдин грамотадиз, гьакIни жуьреба-жуьре конкурсра, илимдинни ахтармишунрин проектра кIвенкIвечи ва приздин чкаяр кьурбур гьазурунай райондин кьилин, школадин директордин патай ганвай гьуьрметдин грамотайрин сагьибни я.
Мектебда ахтармишунар тухвай комиссияди Успагьи Цмихановадин кIвалах ва аялрин чирвилер чешнелубур яз гьисабна.
Успагьи муаллимди хцизни кьве рушаз кьилин образование къачудай мумкинвал яратмишна. Рушари дидедин рехъ давамарзава. Гада экономист я.
Чаз Успагьи муаллимдихъ чандин сагъвал, кIвалахда мадни еке агалкьунар хьана кIанзава.
Къагьриман Ибрагьимов
