РД-дин образованидин ва илимдин министерстводи республикадин муниципалитетрин образованидин управленийрив агакьарнавай хабаррин бинедаллаз, Дагъустандин мектебра чирвилер гунин программайрай нетижаяр кьадай асул вахтунилай фад вахкузвай имтигьанар 21-мартдилай 18-апрелдалди кьиле фида. Идакай министерстводин пресс-къуллугъди хабар гузва.
РикIел хкин, государстводин сад тир имтигьанар асул вахтунилай фад 11 ва 9-классар акьатIарзавай (гьа са вахтунда и ва я маса себебар аваз, имтигьанар асул вахтунда вахкудай мумкинвал авачир), чирвилер гунин план тамамдаказ кьатIуниз, чириз алакьнавай, и ва я маса тарсарай “буржар” аламачир ва мектебдин педсоветдин разивал къачунвай, гьакIни мектеб алатай йисара акьалтIарнавай, амма ЕГЭ вахкуз тахьанвай, я тахьайтIа, къазанмишнавай баллар артухариз кIанзавай аялривай вахкуз жеда.
И кар патал алатай йисарин выпускникар ва юкьван пешекарвилин образованидин программайрай чирвилер къачузвай жегьилар ЕГЭ-диз регистрация ийизвай чкайриз паспортни гваз атун лазим я.
Эгер имтигьанда иштиракзавай касдивай вичивай къвез жезвачтIа, и кар адан паталай диде-бубайривай (закондалди тайинарнавай векилдивай), чеб вужар ятIа (мукьвавал) тестикьарзавай документар къалуруналди ийиз жеда.
«Лезги газет»
