Муаллим!  Зи фикирдалди, гьар са аялдин уьмуьрда сифте дидеди, ахпа адаз тарс гайи муаллимди дерин гел тазва. Муаллим аялдин гележегдин уьмуьрдиз рехъ къалурзавай ва а рекьиз экв гузвай гъед я.

Са шаирди лагьайвал, халис му­­аллим лекь я, адан гъилик квай, тарс гузвай аяларни — адан лувар. А лу­варни гужлубур хьун гьам му­­ал­лим­дин, гьамни аялрин зурба бахт я.

Сифте йикъалай башламишна, муаллимди чирвилер гунилай гъейри, дидеди хьиз, аял писданни хъсандан гъавурда твазва,уьмуьрдин жуьреба-жуьре темайриз талукь суьгьбетар кьиле тухузва, уьмуьрдин турши рекьерай гьикl экъечlдатlа, чирзава.

Гьа ихьтин муаллимрикай сад къадим Дербент шегьердин 11 -нумрадин школада гьакъисагъвилелди зегьмет чlугвазвай, чина милайимвилин нур авай, 52 йисуз математикадин тарсар гузвай чешнелу муаллим  Ибрамхалилова  Гуьлназ  Саидовна  я.

Ери-бине Агъа Стlалдилай тир адан буба Омаров Саид Омаровича Докъузпара, ахпа Кьасумхуьруьн районрин прокурор яз, райондиз Стlал Сулейманан тlвар гайила, исполкомдин председателвиле ва маса жавабдар къуллугърал, адан диде, ахцегьви Тагъидин руш Омарова Важибата Кьасумхуьруьн райондин судьявиле кlвалахна. Ам ДАССР-дин Верховный суддин коллегиядин член, гуьгъуьнин йисара Кьасумхуьруьн школадин директор тир.

Г.Ибрамхалилова Докъузпара райондин Усугъчай хуьре 1944-йисан 7-октябрдиз дидедизх хьана. 1962-йисуз Кьасумхуьруьн юкьван школа къизилдин медалдалди куьтягьна, ДГУ-дин математикадин фа­культетдик экечlна, ам яру дипломдалди 1967 йисуз акьал­тlарна. Къенин йикъалди ада Дербент шегьердин 11-нумрадин юкьван школада кlва­­лахзава. Адан зегьметдин книжкада анжах са кхьин ава: “Математи­кадин муаллимвиле кьабулнава”. И са школада ада кlвалахиз 52 йис я .

Икьван йисара кlвалахзавай идарада, обществода Гуьлназ Саидовнадиз  аялрин, муаллимрин, диде-бубайрин, гьакIни шегьерэгьлийрин патай зурба гьуьрмет ава.

Ада вичин рикlин чимивал, чирвилер, ракъини чилиз багъишзавай нурар хьиз, аялриз пайзава. Ам гьар са аялдив хайи веледдив хьиз эгечl­­­зава, математикадин сирер ачухзава. Адаз вичи тарс гузвай гьар са аялдин алакьунар хъсандиз­ чизва. Аялар кlелунрал рикl алаз чlе­хи авунни муаллимдин хиве авай важиблу везифа я. Адалай и кар­ни алакьзава. Вичин кlвалахда ада методикадин жуьреба-жуьре къайдайрикай, ТСО-дин мумкинвилерикай менфят къачузва, аялрин зи­гьин­див кlвалахиз тазва. Дагъус­тандин халкьдин шаир рагьметлу Хуьруьг Тагьира лагьайвал, авахьна фин тийизвай цикай фад ни къведа.­

Аялни булах хьиз я, адан зигьиндив кlвалахиз туна кIанда. Муаллимдин алахъунрин нетижа яз, аялри еке гьевесдивди математикадай кьиле физвай мярекатра ва олимпиадайра иштиракзава. Абурун арада гьам шегьердин ва гьамни республикадин олимпиадайрин гъалибчиярни ава. Ада тарс гайи аялрикай хъсан пешекарар, гьуьрметлу инсанар хьанва: Москвадин медицинадин академияда кlелза­вай Нуьсрет Мадатов Америкада стажировкада ава, Ибрагьим Абдуллаева Тюмендин нафтlадинни газдин университетда кlелзава, Михаил Арутюняна — РД-дин сбербанкдин управляющий, Къазимегьамед Тагьирова — Курск шегьерда эцигунардай компаниядин руководитель яз, Шуми Шабатаева меценат, карчи яз кlвалахзава.

Тежрибалу муаллим 40 йисуз математикадин методобъединенидин  кьиле хьана. И йисара ам муаллимриз аттестация тухузвай комиссиядин ва экспертрин комиссиядин членни тир. Неинки школада, гьакl жемятдин маса кIвалахрани активнидаказ иштиракзавай  Гуьлназ Саидовна кьуд сеферда ше­гьердин советдин депутатвиле  хкяна. Депутатрин советдани ада образованидиз талукь месэлаяр гьялуник аквадай хьтин пай кутуна.

Халкьдин образованидин хиле чlугур гьакъисагъ зегьметдай, аялриз чирвал ва тербия гунин рекье къазанмишнавай агалкьунрай ам хейлин наградайризни лайихлу хьанва. Адаз  ДАССР-дин Верховный Советдин Президиумдин указдалди 1979-йисуз “Дагъустан Республикадин лайихлу муаллим”, 1985- йисуз “РСФСР-дин школайрин лайихлу муаллим”, 2010-йисуз  “РФ-дин образованидин гьуьрметлу работник” лагьай тlварар  ганва. Гуьлназ Саидовна РФ-дин Президентдин грантдин сагьибни я.

Муаллимвилин пеше хкягъу­никай Гуьлназ Саидовнади икI ла­гьа­на:­

— А вахтунда школайра хъсан кlел­­завай аялриз вузра ва техникумра кlелун давамарун патал направленияр гузвайди тир. Чи дахдиз зун мединститутдиз фена кlан­за­вай. Заз вири тарсарай хъсан къиметар авай. Гьавиляй заз гьиник экечlайтIани тафават авачир. Зун дидедихъ галаз Махачкъаладин мединститутдиз килигиз фена. Анин кабинетра экскурсия авурдалай гуьгъуьниз медвуз зиди туширди зун гъавурда гьатна. Дидедиз зун чlалал гъиз кlан­завай… Шегьер­дин паркуна ацукьнавайла, чи къаншардиз а вахтунда Дагъустандин образованидин министрдин заместитель Исамудин Ханбалаев атана. Адаз зи диде-буба хъсандиз чиз­вай. Заз дидедивай чир хьайивал, ам вич физик тир.

Жузун-качузун авурдалай гуьгъуьниз, чун иниз атунин мурад-метлеб чир хьайила, ада заз ДГУ-дин физматематический факультетдик экечlун теклифна. Гьакl хьунни авуна. Закай вини дережа авай математик хьана.

— Муаллимвилин пешедиз талукь вуч лугьуз жеда? — хабар кьуна за.

—  Муаллимдиз вичи тарс гайи аялрикай къени, хизандин, жемятдин патай гьуьрмет авай, общест­во­диз хийир гудай баркаллу инсан хьана кlанзава. Муаллимди аялдиз тайин предметдай чирвал, гьа са вахтунда тербиядин тарсни гузва, ам аялдиз чешне жезва. Аял­ди вич-вичин юлдашрин арада, чlехи-гъве­­чlидахъ галаз, обществода гьикl ту­худатlа — вири муаллимди­вай­, микь­натlисди хьиз, вичелди чlуг­­ваз­ва. Гьавиляй халис муал­лимди чи гележегдин, акьалтзавай несилдин вилик жавабдарвал гьиссзава, да­тlана вичелни кlвалах­за­ва, чирвал хкажзава. Эгер гьар са муаллимдиз гьар са аялдин ри­кlив кьадай “сирлу куьлег” жагъай­тlа, неин­ки са муаллим, гьакl а аялни бахтлу я, абур чпин метлебрив агакьда.

И мукьвара къейд авур муаллимрин суварин юкъуз Гуьлназ Ибрамхалиловадиз неинки аялри, кlва­лахдин юлдашри, мукьва-кьилийри, гьакlни РД-дин Гьукуматдин Председателдин заместитель, РД-дин  образованидин ва  илимдин министр У. А. Омаровади Муаллимрин югъни 75 йисан юбилей мубаракна.

Ада вичин тебрикдин чарче икl кхьенва:

“Гьуьрметлу Гуьлназ Саидовна! Куьне тамамарзавай педа­гогвилин кlвалах, куьне тарс гузвай аялриз авай кlанивал виниз тир дережадин лайихлу тlвара­рал­ди къейднава: Куьн Россиядинни ­Да­гъустандин лайихлу му­аллим я. Амма Куьн па­талди вирида­лайни багьа савкьат Куьне тарс гайи аялрин агалкьунар ва Квез абуру ийизвай хъсан алхишар я. Куь уьмуьр, гьакъисагъ зегьмет акьалт­завай несилдиз чешне я.

Гьуьрметлу Гуьлназ Саидовна, Квез чна екез гьуьрметзава ва Куьне чlугвазвай четин зегьметдай баркалла лугьузва. Къуй квехъ чандин сагъвал, Дагъустан, Россия мадни вилик финин, абад хьунин рекье цlийи агалкьунар хьурай!”

Гуьлназ Саидовнадихъ бар­каллу хизан — 3 велед , 7 хтул ва 2 штул  ава. Чlехи хва Марата  Дербент ше­гьердин пенсиядин фондуна начальникдин заместитель яз, рушар  Лейлади шегьердин аялрин “Чубарук” бахчадин заведующийвиле, Эльмиради Канадада госпиталда невролог­ яз кlвалахзава. Кьуд хтулди Моск­ва­дин тIвар-ван авай вузра (Финанс­рин университет, Экономикадин высший школа, РАНХиГС, МГУ) кlел­зава.

Гуьлназ Саидовнади тарс гузвай аялри ам школадиз атай гьар са декьикьа уьмуьрдин хуш легьзе хьиз кьабулзава. Абуруз чпин муаллим хайи диде хьиз рикlиз чими ва кlан я. Идалай еке бахт муаллимдихъ авач.

Чи мурадни играми муаллимдихъ мягькем сагъламвал, уьмуьрда ва кlвалахда мадни зурба агалкьунар хьун я.

Къагьриман Ибрагьимов