И мукьвара Дербентда, “Цитадель-Нарын-къала” архитектурадин комплексдин выставкайрин залда, Карачаево-Черкесиядин лайихлу художник, “Художникрин ва дизайнеррин Союз” международный Ассоциациядин векил, Карачаево-Черкесиядин художникрин Союздин председателвиле яргъал йисара зегьмет чIугур ва алай вахтунда Ахцегьа Аскар-Сарыджадин тIварунихъ галай изобразительный искусстводин школадиз регьбервал гузвай Мегьамедзериф Гьажиеван “Крымдин, Кавказдин ва Париждин рагъ” кьил ганвай выставка ачухна.
Автордихъ галаз кьиле фейи куьруь суьгьбетдай малум хьайивал, выставкада анжах пленэрдин (яни тIебиатдал чIугунвай) кIвалахри (абурун кьадар 40-далай виниз тир) чка кьунва. Выставкадиз ганвай кьиляй кьатIуниз четин туширвал, Крымдиз, санлай Кавказдиз ва Париждиз талукь пейзажар, портретар ва натюрмортар авторди жуьреба-жуьре стилрикай ва техникадикай менфят къачуна кхьенва.
Выставкадиз тамашайбурун ва чпин фикирар, адакай чими келимаяр лагьайбурун арада Дербентдин музей-заповедникдин медениятдинни чирвилер гунин, экспозицийринни выставкайрин кIвалахдин рекьяй директордин заместитель Эмилия Амирова, экспозицийринни выставкайрин отделдин начальник Мегьамед Абдуллаев, Дагъустандин культурадин лайихлу работник Зулейха Наметова, Россиядин художникрин Союздин член Мелик-Мамед Агъабалаев, Дагъустандин халкьдин образованидин отличник Билл Жафаров ва масабур ава.
Къейд.
М.Гьажиев 1952-йисуз Ахцегьа дидедиз хьана. 1979-йисуз ДГПУ-дин художественно-графический факультет акьалтIарай жегьилди художественный школада кIвалахиз башламишна. Гуьгъуьнлай ам Карачаево-Черкесиядиз куьч хьана, ана тарсар гун давамарна. М.Гьажиеван ученикрикай гзафбур жуьреба-жуьре конкурсрин гъалибчияр хьана. Хайи ерийривай яргъа яшамиш хьайи саки 30 йисуз ам дуьньядин гзаф чкайра “къекъвена”, цIийи крар чирна. Дагъустандиз хтайла, адан тежриба ва агалкьунар фикирда кьуналди, ам, винидихъ къейднавайвал, изобразительный искусстводин школадин директорвиле тайинарна. Исятда ана 150-далай виниз аялри устадвал хкажзава. Абурукай гзафбур жуьреба-жуьре конкурсрин гъалибчияр я. М.Гьажиеван кIвалахар чи ва къецепатан уьлквейрин музейра ва кьилдин ксарин коллекцийра хуьзва.
Рагнеда Рамалданова
