Дагъустанда Нарын-къеледин цлан кIаникай тоннель эцигун пландик кутунва. И серенжем Дербент шегьердилай элячIна фидай рехъ туькIуьрунин сергьятра аваз кьилиз акъудда. Идакай шегьердин администрациядин пресс-къуллугъди хабар гузва.

Къейдзавайвал, тоннелдин яргъивал тахминан 300 метрдикай ибарат жеда. Чешмедин малуматралди, сифтедай проектдин сергьятра аваз тарихдин объектдин цлай улакьрин гьерекат кардик кутадай ара акъудун пландик кутунвайди тир. Амма къеледин эвелан къамат хуьн патал, гуьгъуьнлай тоннель эцигдай къарар кьабул хъувуна.

Хабар гузвайвал, Дербентдилай элячIна фидай рехъ эцигунин серенжемдиз 51,2 миллиард манатдив агакьна пулдин такьатар акъатда. Тарихдин ирсинин объект тир шегьердин къадим къеле зиян хьуникай хуьнин макьсаддалди, тоннелдин проектдин кIвалахар кьиле тухун патал пешекарар-археологар желбда.

Къейд ийин хьи, Дербентда шегьердилай элячIна фидай рехъ эцигиз къведай йисуз гатIунда.

«Лезги газет»