Алатай киш юкъуз Дагъларин уьлкведин меркездин Редукторный поселокда шад гьалара гьуьлуьн кьере туькIуьрнавай инсанри ял ядай майданар ачухна. Мярекатда Махачкъала шегьердин администрациядин кьил Юсуп Умавова, адан заместителри, РД-дин экономикадин ва мулкар вилик тухунин министр Гьажи Султанова, объект эцигай «СМУ-55» ООО-дин кьилин инженер Али Алигьажиева, мугьманри, шегьердин агьалийри иштиракна.
Лугьун лазим я хьи, шегьерэгьляр ва меркездиз къвезвай кьван мугьманар патал важиблу и проект «Дагъустан Республикадин меркез Махачкъала шегьер хьиз авданламишун ва вилик тухун таъминарун» программадин сергьятра аваз кьилиз акъудна.
Сифте гаф рахуналди, Юсуп Умавова гьуьлуьн кьере кIватI хьанвайбуруз къугъунардай, сагъламвал мягькемардай ва ял ядай гегьенш майданар ишлемишиз вахкун тебрикна. Гьа са вахтунда ада шегьердин маса районрани аваданламишунин, инсанриз ял ядай чкаяр туькIуьрунин кIвалах давамарзавайдакай лагьана. ИкI, инсанри хушдиз кьабулдай1 чкаяр Эльтавдин тама, Вуздин вирин къвалав, 1-Махачкъаладин гьуьлуьн кьерени туькIуьрзава.
Мэрди лагьайвал, и проект шегьердин архитектурадин ва эцигунрин управленидин пешекарри арадал гъана ва «СМУ-55» ООО-дин устIарри кьилиз акъудна.
ИкI, «Приморская» мугьманханадивай шегьердин 1-нумрадин духтурханадив агакьдалди кIарасдин аллея туькIуьрнава. Йифиз вири майдан 200-лай виниз фонарри экуь ийизва. Идалай гъейри гьуьлуьн кьере инсанриз къекъуьн патал пуд жигъир-дорожка (къекъуьн, велосипедар гьалун ва кIвачер массаж авун патал) туькIуьрнава. Ина гьакI дидейрин, капI ийидай кIвалерни кардик кутунва.
Спортдал, физкультурадал рикI алайбуруз тренажеррин, волейболдал, футболдал, баскетболдал къугъвадай майданар ава. Аялар патал къугъунардай кьилдин майдан гьазурнава. Ана машгъулардай гзаф шейэр, алатар, арт-объектар ава.
Сергей Меликова санлай вири республика авадан авун патал тухузвай бегьерлу кIвалах шад мярекатдал рахай Юсуп Умавовани, Гьажи Султановани, Али Алигьажиевани, Ильяс Шихсаидовани, Аида Сайпуллаевдини ва масабуруни къейдна.
Юсуп Умавова эцигунрал тафаватлу хьайи устIарар грамотайралди къейдна.
Хийир Эмиров
