21-июлдиз Дербент шегьерда амбулаториядин диализдин центр ачухунин мярекат кьиле фена. Клиника РФ-дин президентдин тапшуругъдалди эцигна. И гьакъиндай «Лезги газетдиз» шегьердин администрациядин пресс-къуллугъди хабар гузва.

Диализдин клиникаяр, Дагъустандин Гьукуматдихъ галаз разивилелди тестикьарнавай инвестициядин программадин сергьятра аваз, Дагъустандин мулкара Уралдин биомедицинский кластерди арадал гъизва.

Шад мярекатда «Дербент шегьер» ГО-дин кьилин везифаяр вахтуналди тамамарзавай Энрик Муслимовани иштиракна.

Ада шегьердиз цlийи инвесторар къвезвайдакай шадвилелди ихтилатна. гьа са вахтунда ада ихьтин клиника кардик кутун неинки дербентвияр, гьакl вири дагъустанвияр патални важиблу вакъиа тирди къейдна.

Яру лент атlайдалай кьулухъ мярекатдин иштиракчияр дараматдин къенепатаз – палатайриз, кабинетриз, тадаракриз килигна; абуру клиникада медицинадин куьмек гузвай пациентрихъ галазни ихтилатарна.

Къейднавай центрда са вахтунда 100 пациентдиз куьмек гуз жеда. Клиника алай аямдин технологиядин тадаракралди таъминарнава.

Санлай кника эцигуниз ва тадаракламишуниз 100 миллион манатдилайни гзаф пулдин такьатар чара авунвай. Ина 25 цlийи кlвалахдай чка арадал атана.

«Лезги газет»