СКФО-да Россиядин Президентдин патай тамам ихтиярар ганвай Векил Александр Матовникован фикирдалди, Дербент шегьердихъ туристар желб авунин жигьетдай Европадин туризмдин центрайрин дережадин макандиз элкъведай вири жуьрейрин мумкинвилер ава.
Пятигорскда “Машук” форумдин иштиракчийрихъ галаз кьиле фейи гуьруьшда Матовникова икI лагьана:
“Туризмдин хиле чахъ агалкьунар хьанва. Мисал яз, Дербент шегьер къачун. Государстводинни хсуси амадагвилин алакъайри къадим шегьер туристар патал къулай шартIар тешкилнавай центрадиз элкъуьрдай (кьилди къачуртIа, мугьманханаяр, аэропорт эцигдай, цIийи рекьер туькIуьрдай, гьуьлуьн кьер аваданламишдай…) мумкинвилер гуда…”.
А.Матовникова гьисабзавайвал, Дагъустандин туризмдин хел вилик финин карда дагълух чкайри ва спортдини кьетIен чка кьазва. Гьа са вахтунда тамам ихтиярар ганвай Векилди Каспий михьи авунин макьсаддихъ элкъуьрнавай мярекатар кьиле тухунин игьтияж авайдини къейдна.
Дербент Урусатдин ва дуьньядин къадим шегьеррикай сад я. Ам Каспий гьуьлуьн къерехда экIя хьанва. 2015-йисан 19-сентябрдиз шегьердин 2000 йис тамам хьун къейдна. И мулкарал инсанар сифте яз 5000 йис идалай вилик пайда хьана. Шегьер гуьрчегарзавай “безекрикай” сад “Нарын-къеле” я. Алай вахтунда шегьердин руководстводи ина тарихдин туризм вилик тухуниз гзаф фикир гузва.
«Лезги газет»
