“Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, мукьвара республикадин Сад лагьай вице-премьер Гьажимегьамед Гьуьсейнова региондин министерствойринни ведомствойрин кьилерихъ галаз гуьруьш кьиле тухвана. Абуру республикада инвестицийрин программа кьилиз акъудуниз талукь месэлаяр веревирдна.
Гь.Гьуьсейнова хабар гайивал, программадин сергьятра аваз алай йисуз Дагъустанда 178 объект эцигдайвал я. И макьсадриз 18 785,3 миллион манат пул чара авунва. Абурукай 11 066,4 миллион манат — федеральный, 7 718,8 миллион манат пул республикадин бюджетрин такьатар я.
РД-дин Гьукуматдин Председателдин Сад лагьай заместителдин гафаралди, алай йисуз 96 объект ишлемишиз вахкуда. Абурун арада 7 138 касдиз кIелдай чкаяр авай умуми образованидин 27 идара, 22 ясли-бахча, здравоохраненидин — 5, спортдин — 3, целди таъминарунин — 30, газдал таъминарунин — 6 ва маса объектар ава.
Гуьруьшдин нетижаяр кьадайла Гьажимегьамед Гьуьсейнова программада къалурнавай бязи мярекатар тайинарнавай вахтунда акьалтIарун патал жавабдар ксариз са жерге тапшуругъар гана.
«Лезги газет»
