Дагъустанда 1960-йисара эцигай веремазар квай аялар сагъардай санаторийдин дарамат цIийикIа туькIуьр хъийида. “Лезги газетдиз” республикадин здравоохраненидин министерстводин пресс-къуллугъди хабар гайивал, и макьсадриз 20 миллион манат пул чара авунва.
Санаторийдин дарамат акьалтIай пис гьалда ава. Цларай сварар атанва, хандакI ацукьзава. Кьилдин корпусра эцигайдалай инихъ гьич садрани тамамдиз ремонтдин кIвалахар кьиле тухванвач.
Мукьвара санаторийдиз РД-дин здравоохраненидин министр Жамалудин Гьажиибрагьимов мугьман хьанвай. Ада къейд авурвал, дарамат цIийикIа туькIуьр хъувунилай гъейри, иниз цIийи мебель, пекер чуьхуьдай машинар, пищеблок патал алава тадаракар маса къачуна кIанзава. И кIвалахар кьилиз акъудун патал министерстводиз куьмекар гудай меценатар желб ийиз кIанзава.
Къейд ийин хьи, алай вахтунда санаторийда 90 аялди сагъламвал мягькемар хъийизва. Абур ина 3-6 вацра амукьзава. Аялар сагъар хъувун, абурухъ хъсандиз гелкъуьн патал ина вири шартIар арадал гъанва. Санаторийда гьакIни рентген-кабинет ва лаборатория кардик ква.
«Лезги газет»
