Дербент шегьердин 2000 йисан юбилей гегьеншдаказ ва гурлудаказ кьиле тухвайдалай гуьгъуьниз къадим шегьер гьар са рекьяй вилик тухуниз еке фикир гузва. Идан бинедаллаз уьмуьрдиз кечирмишдай махсус программани кьабулнава. Идан гьакъиндай Дербент шегьердин администрациядин кьил Хизри Абакарова малумарна.
Ада лагьайвал, сифте нубатда шегьердин мумкинвилер чирун ва абуруз къимет гун патал комплексный ахтармишунар тешкилда. И кIвалахдин нетижада шегьер яшайишдинни экономикадин рекьяй вилик тухудай гегьенш мастер-план туькIуьрун патал конкурс кьиле тухуда. Ам уьмуьрдиз кечирмишуни вири Дагъустандиз вилик фидай мумкинвилер яратмишда.
Шегьердин майишатдин вири хилер комплекснидаказ ахтармишунал “Центр” агентстводин пешекарар машгъул жезва. Абуру шегьер вич, адан къвалав гвай районар, транспортдин сетар, коммунальный къурулушар, тIебиатдинни рекреациядин майданар ва общественный чкаяр ахтармишда, абур авай гьалдиз къимет гуда. И кIвалахрин сифте пай алай йисан зул алукьдалди куьтягьун лазим я. Гьа и вахтунда мастер-план туькIуьрун патал международный ачух конкурсни кьиле тухуда.
“Центр” агентстводин генеральный директор Сергей Георгиевскийди гъавурда турвал, конкурсда иштирак авун патал шегьерар ва абурун мулкар комплекснидаказ вилик тухунал машгъул, архитектурадин проектар гьазурунин, экономикадин ва финансрин рекьяй чпихъ чирвилер ва тежриба авай Россиядинни международный лап хъсан компанийриз теклифда. Конкурсди лап менфятлу къарар кьабулдай, дуьзгуьн мастер-планар туькIуьрдай шартIар яратмишда. Ида кьетIен месэлаярни, вилик акъвазнавай везифаярни пешекарвилелди гьялдай ва са шумуд командадин тежрибадикай менфят къачудай мумкинвал гуда. Конкурсда иштиракзавай компанийрин ва пешекаррин алакьунриз тежрибалу, алакьунар авай членрикай ибарат жюриди къимет гуда.
Винидихъ къейд авунвай мастер-пландин бинедаллаз къадим шегьер 8 йисан вахтунда вилик тухудай дибдин рекьер тайинарда.
И жуьреда тешкилзавай кIвалахди, са рахунни алач, къадим шегьердин гележег гьич фикир тийизвай жуьреда хъсан патахъ дегишарда.
Абад Азадов
