Докъузпара райондин администрациядин дараматда муниципалитетдин администрациядин кьил Абдурагьим Алискерован регьбервилик кваз нубатдин совещание хьана. Идан гьакъиндай “Лезги газетдиз” администрациядин пресс-къуллугъди хабар гана.
Совещанида райондин кьилин заместителри, хуьрерин кьилери, идарайрин ва организацийрин руководителри иштиракна.
Совещанидин иштиракчияр йикъан месэлайрихъ галаз танишарайдалай гуьгъуьниз райондин кьили гаф администрациядин кьилин заместитель Агьмед Агьмедоваз гана.
Ада 2019-йисан сад лагьай кварталда налогрин, маса харжарин планар тамамаруникай, мал-мулкунин объектриз ва чилин участокриз талукь делилар актара тунин (актуализация) рекьяй планар кьилиз акъудзавай гьалдикай суьгьбетна. А.Агьмедова къейд авурвал, хуьрерин поселенийрин кьилери эменнидиз, чилиз талукь ва налогрин декларацийрихъ галаз алакъалу кIвалах вахтунда акьалтIарун герек я.
Совещанидал 3-февралдилай 15-февралдалди Къурушрин хуьре альпинизмдай кьиле фин лазим тир Россиядин чемпионат тешкилуниз ва тухуниз талукь месэлани веревирдна.
Лугьун лазим я хьи, акъажунра иштиракдай спортсменар яшамиш хьун патал махсус кьве алачух янава, чемпионатдин мугьманар кьабулун патал пуд лагьай алачухни гьазурнава.
Абдурагьим Алискерова малумарайвал, алай йисуз ятар гудай “Текипиркент-Къалажух” къанал ремонт авунин кIвалахар давамарда, идалай гъейри, Авадан хуьре электроэнергия кьенятдай лампаяр акъуддай завод эцигунин кIвалахар гъиле кьада.
Райондин электросетрин лицевой счетрин инвентаризация кьиле тухунин месэладай Ахцегьрин РОЭ-дин начальник Мурад Магьмудов рахана. Ада Докъузпара райондин электросетрин вири абонентри паспортдин делилар, “зеленка”, СНИЛС ва ИНН делилрин базада тун лазим тирдакай лагьана.
Совещанидал гьакIни Мискискарин хуьре газдин линияр чIугуниз ва Къурушрин хуьре туризм вилик тухуниз талукь месэлаярни веревирдна.
«Лезги газет»
